ملير ۾ جسقم بشير قريشي پاران عمرڪوٽ واقعي خلاف احتجاجي مظاهرو

ملير (رپورٽ: عبدالرشيد مورجھريو) عمرڪوٽ ۾ سولنگي برادري جي گهرن تي پوليس جي چڙهائي، نياڻين بزرگن ٻارڙن مٿان تشدد خلاف جيئي سنڌ قومي محاذ شھيد بشير خان طرفان عوامي پريس ڪلب ملير اڳيان احتجاجي مظاھرو ڪري ڌرڻو ھنيو ويو احتجاج جي اڳواڻي جسقم شھيد بشير خان جو ڊويزنل آرگنائيزر چاڪر خان شر، ضلعي چيف آرگنائيزر اشرف ڪلھوڙو، آرگنائيزر فھيم زھراڻي، ڪاشف شر، راجا سيال وھاب گبول اقبال ڪلمتي۽ ٻيا ڪري رھيا ھئا مظاھري ۾ پارٽي ڪارڪنن وڏي تعداد ۾ شرڪت ڪئي ان موقعي تي اڳواڻن خطاب ڪندي چيو ته شاھ مير پير وڏيرا سردار سنڌ کي پنھنجي جاڳير سمجھن ٿا عمر ڪوٽ ۾ بااثر شاھن پوليس ۽ سرڪاري سرپرستي ۾ سنڌ جي نياڻين مٿان ڪاھ ڪري ڪربلا جي ياد تازه ڪئي آهي عمر ڪوٽ جي ونگاري پوليس سنڌ جي نياڻين تي تشدد ڪري يزيدي تاريخ جو ورجاءُ ڪيو آهي سنڌ جي نياڻين جي تذليل تي پوليس اهلڪارن جي معطلي ڪافي ناهي واقعي ۾ ملوث ۽ پٺڀرائي ڪندڙ بااثرن خلاف سخت قانوني ڪاروائي ڪئي وڃي ھنن چيو ته چادر چار ديواري جو تقدس پامال ڪرڻ ۽ بيگناهه مٿان تشدد ڪرڻ ناقابل قبول ۽ انساني حقن جي سنگين ڀڃڪڙي آهي ھنن صوبائي حڪومت تي زور ڏنو ته متاثر خاندانن کي تحفظ ۽ انصاف فراهم ڪيو وڃي اڳواڻن چيو ته مستقبل ۾ اھڙن واقعن کي روڪيو وڃي ٻئي صورت ۾ سنڌي قوم سخت مزاحمت ڪندي