سنڌي ادبي سنگت شاخ موري جي دستوري گڏجاڻي

گڏجاڻي راشد مورائي گورنمينٽ ھاءِ اسڪول ٽائون ڪئمپس ۾ ٿي

مورو (جاني جماڻي) سنڌي ادبي سنگت شاخ موري جي دستوري گڏجاڻي راشد مورائي گورنمينٽ ھاءِ اسڪول مورو ٽائون ڪئمپس ۾ ٿي گذري، جنهن جي صدارت نوجوان نقاد ۽ دانشور محترم علي خادم بالادي ڪئي. پروگرام جو آغاز خوبصورت آواز جي مالڪ علي دوست قاسمي لطيف سائين جي وائي سان ڪيو. دستوري گڏجاڻيءَ ۾ جن شاعرن ۽ اديبن پنھنجون نڪور تخليقون تنقيدي ۽ اصلاحي راين لاءِ پيش ڪيون، تن ۾ معشوق محسن ابڙو (غزل) خالد 'ساحل' ڪيريو ( مضمون)، صوفي امتياز ٻلال (غزل)، عنايت سولنگي (نظم)، ھاشم سولنگي (نثري نظم)، اظھار مخدوم (ڪھاڻي)، سراج عزيز (غزل)، مشڪ لغاري (غزل)، ۽ عزيز سابقي غزل ترنم ۾ پيش ڪيو. مٿين شاعرن ۽ اديبن جي تخليقن تي جن اديبن پنھنجا تنقيدي ۽ اصلاحي رايا ڏنا، تن ۾ پروفيسر شمشاد احمد سومرو، حسن صوفاڻي، دين محمد سيتائي، سڪندر ڪورائي، سيد ياسين شاھ، خادم حسين لانگاھ، بالا بلوچ، راؤ محمد اسلم ٽيپو، منور علي، مجاھد علي، ساگر علي حب، ۽ ٻيا شامل ھئا. ان موقعي تي نوجوان راڳي عابد حسين سولنگي ۽ ڪالو فقير پنھنجي خوبصورت آواز ۾ گيت پيش ڪيا.صدارتي راءِ ڏيندي نوجوان نقاد ۽ دانشور علي خادم بالادي چيو تہ اڄوڪي گڏجاڻيءَ ۾ شاعرن پنھنجا ڀرپور اسم پيش ڪيا. جن ۾ جماليات، رومانس، سماجيات، فطرت نگاري، علامت نگاري ۽ جدت جا انيڪ انڊلٺي رنگ ۽ ٻوليءَ جون حسناڪيون آھن. نوجوان شاعر،اسڪالر سنگت جي سيڪريٽري خالد 'ساحل' ڪيريي سنگت جي گڏجاڻين کي تسلسل سان ھلائي سنڌي ٻوليءَ ۽ ادب سان محبت جو ثبوت ڏنو آهي. اڄ سنگت شاخ موري جي گڏجاڻي جي صدارت ڪرڻ مون لاءِ اعزاز آھي. اميد آهي تہ سنڌي ادبي سنگت جون ھي دستوري گڏجاڻيون، تخليقي ۽ فڪري سفر مستقبل ۾ سنڌي ٻوليءَ ۽ ادب جي زرخيزي ۾ اھم ثابت ٿينديون. ھن گڏجاڻيءَ جي ڪاروائي عنايت سولنگي ھلائي.