سنڌي ادبي سنگت ملير پاران صحافي حمزو پنھور جي وڇوڙي تي تعزيتي گڏجاڻي

حمزي پنھور جو وڇوڙو قومي سانحو آھي، ڇاڪاڻ ته اھڙا آدرشي انسان ورلي پيدا ٿيندا آھن: مقرر

ملير (رپورٽ: عبدالرشيد مورجھريو) سنڌي ادبي سنگت شاخ ملير پاران سينيئر صحافي، استاد ۽ قومپرست اڳواڻ حمزو پنھور جي وڇوڙي تي تعزيتي گڏجاڻي ڪوٺائي وئي، مرحوم جي خدمتن کي ڀيٽا پيش ڪئي گڏجاڻي جي صدارت ڪندي قومي شاعر سيد غفور شاھ تقوي چيو ته ڪجھ ماڻھن جو ھن دنيا مان وڃڻ جو رنج صرف سندن خاندان تائين محدود نه ھوندو آھي، پر پوري قوم ان نقصان کي محسوس ڪندي آھي هن چيو ته حمزو پنھور پڻ اهڙين ئي شخصيتن مان هو، جن جو وڇوڙو قومي وڇوڙو آھي، ڇاڪاڻ ته اھڙا آدرشي انسان ورلي پيدا ٿيندا آھن. هن وڌيڪ چيو ته مرحوم نج پج قوم پرست ھيو ۽ سندس قول ۽ فعل ۾ ڪو به فرق نه ھوندو ھيو.سينيئر صحافي ۽ عوامي پريس ڪلب ملير جي اڳوڻي صدر سامي ميمڻ چيو ته حمزو پنھور رڳو صحافي يا استاد نه پر هڪ گهڻ رخي شخصيت ھيو ھن چيو ته مرحوم هڪ سچو صحافي، مخلص استاد ۽ پڪو قوم پرست ھيو، جنهن جي رڳ رڳ ۾ قومي درد سمايل ھيو، ۽ اهو ئي جذبو کڻي هو هميشه لاءِ وڇڙي ويو، پر سندس خدمتون هميشه ياد رکيون وينديون قمبر ٻٽ چيو ته حمزو پنھور جهڙي شخصيت جي سنڌ ڌرتي کي سخت ضرورت آھي. هن چيو ته مرحوم جنهن به اداري يا تنظيم سان لاڳاپيل رهيو، اتي هن مخلصي سان پنهنجو ڪردار ادا ڪيو ۽ سنڌ ۽ سنڌي ماڻهن لاءِ سندس خدمتون وسارڻ جهڙيون ناهن شاخ جي سيڪريٽري اصغر مھرائي چيو ته سنڌ پنهنجي سچي پٽ جي وڇوڙي تي ڏک ۾ مبتلا آهي ۽ سندس جاءِ ڀرڻ ڏکيو ڪم آھي. مجيب سنڌي چيو ته حمزو پنھور سان هر ملاقات ۾ سندس زبان تان سنڌ جو ورد ٻڌڻ لاءِ ملندو هو، ۽ اڄ اهو آواز هميشه لاءِ خاموش ٿي ويو آھي.طارق جان سھتي چيو ته حمزو پنھور جي وڇوڙي سان نه صرف صحافت يتيم ٿي آهي پر سنڌ ڌرتي پڻ پاڻ کي يتيم محسوس ڪري رهي آهي.تعزيتي گڏجاڻي ۾ عنايت شاھ، ڊاڪٽر علي اصغر، جمشيد زهراڻي، جامي ميمڻ، سليمان شاھ ۽ ماجد علي شيدي پڻ شرڪت ڪئي ۽ مرحوم جي بلند درجن لاءِ دعا ڪئي