ملير: گلشن حديد فلٽر پلانٽ ويجهو معصوم ٻارڙِي پاڻي لائين ۾ ٻڏي وئي، وارثن جو احتجاج

ملير (رپورٽ: عبدالرشيد مورجھريو) گلشن حديد فلٽر پلانٽ ويجهو ڪراچي واٽر ڪارپوريشن جي پاڻي لائين ۾ 12 ورهين جي ٻارڙي ٻڏي وڃڻ کي 24 ڪلاڪ گذري ويا آهن پر ٻارڙي جو لاش هٿ نه اچي سگهيو آهي، جنهن سبب وارثن ۽ علائقي واسين ۾ سخت بيچيني پکڙجي وئي آهي مليل ڄاڻ موجب 12 ورهين جي ثنا ڌيءَ نذير چنو گلشن حديد ڀرسان گجو کان ڪراچي ايندڙ پاڻي لائين ويجهو موجود هئي ته اوچتو 15 فٽ اونهي پاڻي لائين ۾ ڪري ٻڏي وئي۔ اطلاع ملڻ تي اسٽيل ٽائون پوليس، ريسڪيو ٽيمون ۽ واٽر ڪارپوريشن جا عملدار واقعي واري هنڌ پهتا، جتي ابتدائي ڪارروائي ڪرڻ بعد واپس هليا ويا۔ذريعن موجب پاڻي لائين ۾ لڳ ڀڳ 15 فٽ اونهو ۽ تيز وهڪرو هجڻ سبب ٻارڙي جي ڳولا ۾ ڏکيائيون پيش اچي رهيون آهن، جڏهن ته لاش هٿ ڪرڻ لاءِ ڪوششون جاري هجڻ جون دعوائون ڪيون پيون وڃن۔ٻئي پاسي ٻارڙي جو لاش نه ملڻ تي وارثن ۽ ڳوٺاڻن سخت احتجاج ڪيو ۽ واٽر ڪارپوريشن انتظاميا تي غفلت جو الزام لڳايو۔ احتجاج ڪندڙن چيو ته واقعي کان پوءِ لاڳاپيل ادارن سنجيدگي نه ڏيکاري ۽ رڳو رسمي ڪارروائي ڪري واپس هليا ويا، جنهن سبب ٻارڙي جي ڳولا ۾ دير ٿي رهي آهي۔ وارثن مطالبو ڪيو ته پاڻي جي وهڪري کي عارضي طور بند ڪري جديد اوزارن سان ڳولا آپريشن ڪيو وڃي ته جيئن ٻارڙي جو لاش جلد هٿ اچي سگهي۔ هنن اختيارين کان مطالبو ڪيو ته واقعي جي جاچ ڪري ذميوارن خلاف ڪارروائي ڪئي وڃي ۽ اهڙن افسوسناڪ واقعن کان بچڻ لاءِ حفاظتي انتظام ڪيا وڃن۔واقعي بعد علائقي ۾ سوڳ واري فضا ڇانيل آهي، جڏهن ته وارثن اعليٰ اختيارين کان فوري نوٽيس وٺي ٻارڙي جو لاش هٿ ڪرڻ لاءِ اثرائتا قدم کڻڻ جي اپيل ڪئي آهي۔