ٺٽي ۾ جيئي سنڌ رهبر ڪميٽي جي سڏ تي تيل اگهن ۾ واڌ خلاف ڌرڻو

ٺٽو( شفيق ڀٽي)جيئي سنڌ رھبر ڪميٽي جي مرڪزي سڏ تي پيٽروليم شين جي اگهن ۾ بي رحم واڌ خلاف ۽ سنڌ کي فوري طور آفت زده قرار ڏيڻ جي مطالبي لاءِ جيئي سنڌ محاذ پاران زوردار احتجاج ڪيو ويو۔ احتجاجي ريلي جي اڳواڻي جئي سنڌ محاذ جي مرڪزي وائيس چيئرمين سيد نواز شاهه ڀاڏائي، جست اڳواڻ راول ڪرناڻي، جسقم اڳواڻ سانوڻ برفت، جسقم آريسر حفيظ آزاد، جئي سنڌ محاذ ضلعي اڳواڻ امجد شورو مرتضيٰ لاشاري، نادر شاھ ڀاڏائي ۽ سرفراز پنھور ڪئي۔ ريلي دولھ درياهه خان پارڪ کان مڪلي باءِ پاس تائين پهتي، جتي مظاهرين ڌرڻو هنيو، نيشنل هاءِ وي مڪمل طور بلاڪ ڪري ٽريفڪ معطل ڪري ڇڏي، جنهن سبب گاڏين جون ڊگهيون قطارون لڳي ويون۔ مظاهرين حڪومت خلاف شديد نعريبازي ڪندي چيو ته عوام کي مهانگائي جي باهه ۾ اڇلايو ويو آهي ۽ پيٽروليم اگهن ۾ واڌ ظلم جي انتها آهي۔ هنن خبردار ڪيو ته جيڪڏهن فيصلا واپس نه ورتا ويا ته احتجاج جو دائرو وڌيڪ وڌايو ويندو ۽ سخت قدم کنيا ويندا۔