ملير: ايجوڪيشن سٽي جي مسئلي تي اعليٰ سطحي اجلاس، مقامي مطالبا منظور

اجلاس ۾ سنڌ حڪومت سميت ملير مان چونڊيل نمائندن جي شرڪت زمين، روزگار ۽ تعليمي حقن بابت خدشن تي غور

ملير (رپورٽ: عبدالرشيد مورجھريو) ايجوڪيشن سٽي بابت هڪ اهم اعليٰ سطحي اجلاس منعقد ٿيو، جنهن ۾ فريال ٽالپر، سيد مراد علي شاهه، چيف سيڪريٽري سنڌ، ڪمشنر ڪراچي، ڊپٽي ڪمشنر ملير، سينيئر ميمبر بورڊ آف روينيو سميت ملير سان تعلق رکندڙ قومي ۽ صوبائي اسيمبلي جي ميمبرن شرڪت ڪئي۔ اجلاس ۾ ايجوڪيشن سٽي منصوبي سان لاڳاپيل مختلف معاملن تي تفصيلي غور ڪيو ويو، جڏهن ته ذريعن موجب گذريل ڏينهن ڊپٽي ڪمشنر آفيس ۾ ايم اين ايز، ايم پي ايز، لوڪل سروي ڪميٽي ۽ ٻين اسٽيڪ هولڊرز وچ ۾ طئي ٿيل ايجنڊا جي توثيق ڪندي ان کي متفقه طور منظور ڪيو ويو۔اجلاس دوران سينڪشن ۽ اِن سينڪشن ڳوٺن جي حيثيت، گرين بيلٽ، مقامي هارين جي 30 سالن کان آباد زرعي زمين، رهائشي حقن، قبرستانن جي تحفظ سميت مقامي آبادي جا ڪيترائي مطالبا تسليم ڪيا ويا، جنهن کي شرڪت ڪندڙن علائقي واسين لاءِ اهم اڳڀرائي قرار ڏنو۔ان موقعي تي عبدالحڪيم بلوچ، سليم بلوچ، راجا رزاق بلوچ ۽ امداد علي جوکيو سخت موقف اختيار ڪندي مقامي ماڻهن جي حقن جي تحفظ جو مطالبو ڪيو۔ بعد ۾ عبدالحڪيم بلوچ ڊاڪٽر عاصم حسين خلاف شڪايت ڪندي چيو ته ايجوڪيشن سٽي ۾ مقامي ماڻهن جي ٻارن کي داخلا نه ڏني پئي وڃي۔ان تي فريال ٽالپر چيو ته ساجد جوکيو گذريل ڏهه سالن کان ايجوڪيشن سٽي بورڊ جو ميمبر آهي، جنهن تي اجلاس ۾ موجود شرڪت ڪندڙن حيرت جو اظهار ڪندي چيو ته ايتري عرصي باوجود نه مقامي ٻارن کي داخلا ملي آهي ۽ نه ئي روزگار جا موقعا فراهم ڪيا ويا آهن۔ مقامي اڳواڻن جو چوڻ هو ته ايجوڪيشن سٽي منصوبي دوران مقامي ماڻهن کي زمينن، نوڪرين ۽ تعليمي موقعن کان محرومي کي منهن ڏيڻو پيو آهي، جنهن سبب علائقي ۾ سخت بيچيني پکڙيل آهي۔ اڳواڻن اميد ظاهر ڪئي ته ايندڙ وقت ۾ ملير جا مقامي نمائندا عوامي مسئلن جي حل لاءِ اثرائتو ڪردار ادا ڪندا۔