پپري ۾ وفاقي ٽي سي پي گدام مان 200 کان وڌيڪ مزدورن جي جبري برطرفي خلاف ڌرڻو

ملير (رپورٽ: عبدالرشيد مورجھريو) پپري ۾ قائم وفاقي اداري ٹریڈنگ کارپوریشن آف پاکستان (ٽي سي پي) جي گدام مان 200 کان وڌيڪ مزدورن کي مبينا طور جبري طور برطرف ڪرڻ خلاف متاثر مزدورن قومي شاهراهه ڀرسان مک دروازي آڏو احتجاجي مظاهرو ڪري ڌرڻو هنيو۔ احتجاج ڪندڙ مزدورن ٽي سي پي گدام انچارج ۽ لاڳاپيل ٺيڪيدار خلاف سخت نعريبازي ڪندي الزام هنيو ته انتظاميه ڄاڻي واڻي مزدورن جي مزدوري جا ڪروڙين رپيا هڙپ ڪرڻ لاءِ کين نيڪالي ڏني آهي۔ سندن چوڻ هو ته ڪيترن ئي مهينن کان واجبات روڪيل آهن ۽ پورهيو گهرڻ تي کين انتقامي ڪارروائي جو نشانو بڻايو ويو آهي۔مزدورن جو چوڻ هو ته عيد ويجهو هجڻ باوجود سندن روزگار کسيو ويو آهي، جيڪو سندن معاشي قتل برابر آهي۔ هنن الزام لڳايو ته مزدورن کي بنا ڪنهن نوٽيس ۽ قانوني ڪارروائي جي برطرف ڪيو ويو، جيڪو سراسر ناانصافي آهي۔احتجاج سبب قومي شاهراهه تي ٽريفڪ جي رواني متاثر ٿي ۽ گاڏين جون قطارون لڳي ويون۔ اطلاع ملڻ تي پوليس نفري پهچي صورتحال تي ڪنٽرول رکيو، جڏهن ته ڪنهن به اڻ وڻندڙ واقعي جي اطلاع نه ملي۔احتجاج ڪندڙن مطالبو ڪيو ته:برطرف ڪيل سمورن مزدورن کي فوري طور بحال ڪيو وڃي رهيل سموريون مزدوريون ۽ واجبات ادا ڪيا وڃن ذميوار عملدارن ۽ ٺيڪيدار خلاف جاچ ڪري ڪارروائي ڪئي وڃي مزدورن خبردار ڪيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو وڌايو ويندو۔ ٻي طرف ٽي سي پي انتظاميه يا ٺيڪيدار جو موقف سامهون اچي نه سگهيو آهي۔