ڪنري پوليس پاران نجي جيل مان 33 هارين کي بازياب ڪرائڻ جي دعويٰ

عمرڪوٽ (ڊ ر) عدالتي حڪم تي ڪنري پوليس ڪارروائي ڪندي زميندار جي مبينا نجي جيل مان 33 هارين کي بازياب ڪرائي ورتو، بازياب ٿيلن ۾ مردن سان گڏ عورتون ۽ ٻار پڻ شامل، عدالت ۾ پيش، مرضي موجب زندگي گذارڻ جي اجازت. تفصيل موجب سيشن ڪورٽ عمرڪوٽ جي حڪم تي ڪنري پوليس ڪنري ويجهو ڳوٺ محمود آباد ۾ زميندار داؤد قادياني جي زرعي زمين تي ڇاپو هڻي مبينا نجي جيل مان 33 هارين کي بازياب ڪرايو، بازياب ٿيلن ۾ مردن سان گڏ عورتون ۽ ٻار پڻ شامل آهن. بازياب ڪرايل هارين ۾ شگن، پرسو، ڀلجي، نيلو، تلجي، شريمتي جوي، رادها، ڪرمان، گومي، وينتا، اجوتي، چندري، ناني، ڪملیش، ڀيمراج ۽ ڪرشن سميت ٻيا شامل آهن. سيشن ڪورٽ عمرڪوٽ ۾ گينو ڪولهي نالي هاري هارين جي بازيابي لاءِ درخواست داخل ڪئي هئي، جنهن ۾ موقف اختيار ڪيو ويو هو ته زميندار انهن کان جبري پورهيو وٺندو هو ۽ کين راشن توڙي علاج معالجي لاءِ خرچ به فراهم نه ڪندو هو. پوليس موجب ڇاپي دوران هاري آزادانه طور تي پنھنجن گهرن ۾ موجود هئا. پوليس سڀني بازياب ڪرايل هارين کي سندن سامان سميت ڪنري ٿاڻي منتقل ڪيو ويو. جتان کين سيشن ڪورٽ عمرڪوٽ ۾ پيش ڪيو ويو، جتي عدالت کين آزاد قرار ڏيندي پنهنجي مرضي مطابق زندگي گذارڻ جي اجازت ڏئي ڇڏي.