شاهه لطيف ٽائون واسڻ عورت جو ٿاڻي اڳيان احتجاج جو نوٽيس, ايس ايس پي انويسٽيگيشن اڻ ڌري جاچ جو حڪم ڏئي ڇڏيو

عورت مبينا طور وڪيل طرفان تشدد ڪرڻ ۽ ڪيس داخل نه ڪرڻ خلاف احتجاج ڪيو هو

ملير (رپورٽ: عبدالرشيد مورجھريو) سوشل ميڊيا تي شاهه لطيف ٽائون جي هڪ رهواسي عورت پاران مبينا طور هڪ وڪيل طرفان تشدد ڪرڻ ۽ ٿاڻي ۾ ڪيس داخل نه ڪرڻ خلاف ٿاڻي اڳيان احتجاج واري معاملي جو ايس ايس پي انويسٽيگيشن ضلع ملير فوري نوٽيس ورتو آهي۔ترجمان موجب اطلاع ملندي ئي ايس ايس پي انويسٽيگيشن ملير ٿاڻو شاهه لطيف ٽائون جي انچارج کي هدايتون جاري ڪيون ته واقعي ۾ ملوث شخص خلاف فوري قانوني ڪارروائي ڪئي وڃي۔ان کان علاوه ٿاڻو شاهه لطيف ٽائون جي جاچ آفيسر خلاف به کاتي اندر ڪارروائي جو آغاز ڪندي کيس شوڪاز نوٽيس جاري ڪيو ويو آهي۔پوليس اختيارين موجب متاثر خاندان سان رابطو ڪري سندن خدشن کي دور ڪرڻ جي به خاطري ڪرائي وئي آهي۔معاملي جي شفاف ۽ غير جانبدار جاچ لاءِ ڊي ايس پي انويسٽيگيشن ملير سٽي کي انڪوائري آفيسر مقرر ڪيو ويو آهي۔ کيس هدايت ڪئي وئي آهي ته معاملي جي مڪمل ۽ غير جانبدار جاچ ڪري سمورا حقيقتون سامهون آنديون وڃن۔پوليس اختيارين جو چوڻ آهي ته ڪو به پوليس آفيسر قانون کان مٿانهون ناهي، جيڪڏهن ڪنهن به قانون جو غلط استعمال ڪيو ته ان خلاف سخت کاتيوار ڪارروائي ڪئي ويندي۔