ٺٽو: مڪلي باءِ پاس موڙ وٽ ڊمپر جهوپڙي مٿان چڙهي ويو،ماءُ ڌيءَ ۽ پٽ سميت فوت

فوتين ۾ گڏي باگڙي، سندس معصوم پٽ امير ۽ شادي شده ڌيءَ جانڪي شامل

ٺٽو(ڊ ر) گذريل رات دير سان مڪلي باء پاس تي خوفناڪ حادثي ۾ اجل جو شڪار ٿي ويل باگڙي برادري جي هڪ ئي گهر جي فوت ٿي ويل ٽن ڀاتين جا مڙھ ضروري ڪاروائي بعد اڄ صبح راهوڪي گولاڙچي روانا ڪيا ويا هڪ معصوم ٻار جي حالت ڳڻتي جوڳي هجڻ ڪري کيس سول اسپتال ۾ داخل ڪيو ويو گذريل آڌي رات جو مڪلي باء پاس موڙ وٽ تيز رفتار ريتي سان ڀريل ڊمپر روڊ ڀرسان جهوپڙا اڏي رهندڙ پورهيت باگڙي برادري جي هڪ گهر مٿان چڙھي گهرڀاتين کي چيباٽي ڇڏيو جنهن جي نتيجي ۾ هڪ ئي گهر جا 3 ڄڻا چيباٽجي فوت ٿي ويا جڏھن ته هڪ معصوم ٻار کي ٻن ڪلاڪن جي ڪوششن بعد ريسڪيو ٽيمن بچائي زخمي حالت ۾ ڪڍي ورتو آڌي رات ستل گهرڀاتين مٿان ڊمپر چڙھي وڃڻ ڪري گهرڀاتين ۾ دانھون ۽ رڙيون پئجي ويون 1122 جي ريسڪيو ٽيمن سميت پوليس ۽ مقامي انتظاميه توڙي شھرين وڏي انگ ۾ پهچي ڦاٿل ماڻھن کي بچائڻ لاء ريسڪيو ڪارروائي شروع ڪئي اسسٽنٽ ڪمشنر ٺٽو فهيم شاڪر جي اڳواڻي ۾ انتظاميه پاران هٽاچي ۽ ڪرين مشين گهرائي ٻن ڪلاڪن جي ڪوششن بعد ڊمپر کي هڪ پاسي ڪلٽي ڪرائي ڦاٿل زخمي حالت ۾ معصوم ٻارڙي بادل کي ريسڪيو ڪري ڪڍيو ويو ۽ فوت ٿيلن جا لاش ڪڍي سول اسپتال منتقل ڪيا ويا فوتين جي سڃاڻپ غريب پورهيت درزي باگڙي جي زال مسمات گڏي سندس معصوم پٽ امير ۽ سندس شادي شده ڌي مسمات جانڪي طور ڪئي وئي جن جا لاش ضروري ڪارروائي بعد اڄ صبح سندن اباڻي ڳوٺ راهوڪي نيا ويا سخت زخمي حالت ۾ ريسڪيو ڪري ڪڍيل معصوم ٻارڙو بادل پڻ متاثر پورهيت درزي باگڙي جو پوھٽو آھي جنهن کي اسپتال ۾ داخل ڪيو ويو آڌي ويل هانءُ ڏاريندڙ خوف حادثي جو اطلاع ملندي ئي وڏي انگ ۾ شھري سياسي سماجي ڪارڪن حادثي واري هنڌ پهچي ڊمپر مافيا خلاف سخت احتجاج ڪيو ۽ مطالبو ڪيو ته متاثر خاندان جي مالي سهائتا ڪري ڊمپرن سميت هيوي گاڏين جي شھري آبادين مان گذر تي پابندي لاڳو ڪئي وڃي