استادن جا مسئلا حل ڪرائڻ سندن اولين ترجيحن ۾ شامل آھي: آصف مصطفيٰ خشڪ

ضلعي ۾ بند پيل اسڪول کولرائڻ لاءِ ڪردار ادا ڪنداسين: گسٽا تعلقو گهوڙاٻاڙي جو سينيئر نائب صدر

ٺٽو(محمد شفيق ڀٽي) عوامي پريس ڪلب ٺٽو تي گسٽا تعلقو گهوڙاٻاڙي جي نئين چونڊيل سينيئر نائب صدر آصف مصطفيٰ خشڪ خيالن جو اظهار ڪندي چيو آھي تہ استادن جا مسئلا حل ڪرائڻ سندن اولين ترجيحن ۾ شامل آھي، جڏهن تہ ضلعي ۾ بند پيل اسڪول کولرائڻ ۽ انهن ۾ تدريسي عمل بحال ڪرائڻ بہ سندن اهم ايجنڊا جو حصو آھي۔ هن مطالبو ڪندي چيو تہ جون 2025ع کان ڀرتي ٿيل استادن کي تقريبن هڪ سال مڪمل ٿيڻ وارو آھي، پر اڃا تائين مختلف بھانن ۽ هٿرادو رڪاوٽن سبب سندن پگھارون جاري ناهن ڪيون ويون، جنهن ڪري هو موجوده مھانگائي جي دور ۾ سخت پريشانين ۽ فاڪاڪشي واري صورتحال کي منهن ڏئي رهيا آهن۔ هن وڌيڪ چيو تہ استادن جي سينيارٽي لسٽ بہ اڃا تائين تيار ناهي ڪئي وئي، جنهن سبب نون استادن ۾ بيچيني وڌي رهي آھي۔ آصف مصطفيٰ خشڪ مطالبو ڪيو تہ فوري طور سينيارٽي لسٽ جاري ڪري استادن ۾ موجود بيچيني ختم ڪئي وڃي۔ هن استادن کي اپيل ڪندي چيو تہ هو گڏجي اتحاد جو مظاهرو ڪن ۽ سندن ٻانهن ٻيلي بڻجن، تہ جيئن سندن جائز مسئلا جلد کان جلد حل ڪرائي سگهجن۔ هن تعليم کاتي جي صوبائي وزير سيد سردار شاه کي پڻ اپيل ڪئي تہ نوان استاد بند پيل اسڪول کولرائڻ لاءِ پُرعزم آهن، جيڪڏهن سرڪاري سطح تي سنجيده قدم کنيا وڃن تہ هو مڪمل سهڪار ڪرڻ لاءِ تيار آهن۔ ان موقعي تي عوامي پريس ڪلب ٺٽو جو صدر بلاول سمون، محمد عمر سرائي، ممتاز سميجو، ڪامريڊ زاھد جوکيو، دادا اقبال ڪنڀار، ميڪش گواريو ۽ ٻين سندس آڌرڀاءُ ڪيو ۽ کيس اجرڪون اوڍايون.