بن قاسم پوليس پاران اسٽيل مل مان اسڪريپ چوري ڪندڙ 7 ڄڻا گرفتار ڪرڻ جي دعويٰ

ننڍي عمر جي ٻارن کان چوري ڪرائيندڙ اسڪريپ ڊيلر کي به سوگهو ڪري ورتو آهي: پوليس

ملير (رپورٽ: عبدالرشيد مورجھريو) ايس ايس پي ملير ڊاڪٽر عبدالخالق جي هدايتن تي پاڪستان اسٽيل مل مان قيمتي سامان چوري ڪندڙ عنصرن خلاف جاري ڪريڪ ڊائون دوران بن قاسم پوليس ڪارروائي ڪندي هڪ مبينا اسڪريپ ڊيلر سميت 7 ڄڻن کي گرفتار ڪري ورتو.پوليس موجب گرفتار ٿيلن ۾ وقاص نالي اسڪريپ ڊيلر ۽ 6 ننڍي عمر جا ٻار شامل آهن، جن کي مبينا طور چوري جي وارداتن ۾ استعمال ڪيو ويندو هو. پوليس جو چوڻ آهي ته جوابدار وقاص پاڻ گرفتاري کان بچڻ لاءِ ننڍي عمر جي ٻارن کان اسٽيل مل جي مختلف علائقن مان لوهه، ٽامو ۽ ٻيو اسڪريپ چوري ڪرائيندو هو.گرفتار ٿيلن جي سڃاڻپ عبدالرئوف، صديق، الله بچايو، اسلم، حنيف ۽ اسد جي نالن سان ٿي آهي. ڪارروائي دوران پوليس جوابدارن جي قبضي مان 120 ڪلوگرام چوري ٿيل بولٽس، لوهه ۽ ٻيو اسڪريپ به هٿ ڪري ورتو.شروعاتي جاچ موجب جوابدارن جو ٽولو پاڪستان اسٽيل مل مان چوري ڪيل اسڪريپ مختلف گودامن ۽ خريدارن کي وڪرو ڪرڻ ۾ ملوث هو. پوليس جوابدارن جو اڳوڻو ڏوهاري رڪارڊ پڻ حاصل ڪري رهي آهي، جڏهن ته گرفتار ٿيلن خلاف قانوني ڪارروائي شروع ڪري وڌيڪ جاچ جاري رکي وئي آهي.پوليس اختيارين موجب ضلعي ملير ۾ ڏوهارين ۽ قومي ملڪيت کي نقصان پهچائيندڙ ٽولن خلاف اثرائتي ڪارروائين جو سلسلو جاري رکيو ويندو.