عمرڪوٽ: ۾ استادن ۽ سرڪاري ملازمن جو مطالبن جي مڃتا لاءِ احتجاج

عمرڪوٽ (رپورٽ:ڪانجي مل رکيسر) عمرڪوٽ ۾ ينگ ٽيچر الائنس، گسٽا، پ ٽ الف، آل پاڪستان ڪلرڪس ايسوسيئيشن ۽ ٻين استادن توڙي سرڪاري ملازمن جي تنظيمن جي سڏ تي مطالبن جي مڃتا لاءِ عمرڪوٽ پريس ڪلب آڏو احتجاجي مظاهرو ڪيو ويو، مظاهري جي اڳواڻي راشد منڱريو، امتياز ڪنڀر، روبينا قائمخاني، قادر ساند، جاويد سومرو، ڀرت بنسي مالهي، احسان شاهاڻي، ابراهيم رند، علي شير، عبدالواحد، شهباز ميرچند ۽ ٻين ڪئي، احتجاج دوران استادن ۽ ملازمن هٿن ۾ پلي ڪارڊ ۽ بينر کڻي پنهنجن مطالبن جي حق ۾ سخت نعريبازي ڪئي، ان موقعي تي اڳواڻن ميڊيا سان ڳالهائيندي چيو ته ملڪ ۾ وڌندڙ مهانگائي سبب سرڪاري ملازم سخت معاشي مشڪلاتن کي منهن ڏئي رهيا آهن، تنهن ڪري وفاقي حڪومت ۽ ٻين صوبن جي ملازمن جيان سنڌ جي سرڪاري ملازمن کي به فوري طور 30 سيڪڙو ڊي آر اي الائونس ڏنو وڃي، هنن مطالبو ڪيو ته گروپ انشورنس جي رقم بنا دير ادا ڪئي وڃي، پگهارن ۾ مهانگائي جي تناسب سان 100 سيڪڙو واڌ ڪئي وڃي، جڏهن ته هائوس رينٽ ۽ ڪنوينس الائونس ۾ پڻ خاطرخواهه اضافو ڪيو وڃي، اڳواڻن چيو ته ريٽائرڊ ملازمن جا واجبات وقت سر ادا ڪيا وڃن، ڪلارڪن جون پوسٽون گريڊ 15 تائين اپ گريڊ ڪيون وڃن ۽ نان پروفيشنل پوسٽن جي اپ گريڊيشن وارو عمل مڪمل ڪيو وڃي، احتجاج ڪندڙن فوتي ڪوٽا تي ڀرتين جو عمل فوري بحال ڪرڻ، اين ٽي ايس سميت ٻين ڀرتين جا مرحلا شفاف بڻائڻ، پروموشن لاءِ ڊي پي سي اجلاس ترت ڪرائڻ ۽ ڪانٽريڪٽ، ڊيلي ويجز ۽ ايڊهاڪ ملازمن کي مستقل ڪرڻ جو پڻ مطالبو ڪيو، هنن چيو ته تعليمي بورڊ حيدرآباد سميت ٻين بورڊن جي رهيل واجبات ادا ڪيا وڃن ۽ مالي سال /2026/27ع جي بجيٽ ۾ سرڪاري ملازمن لاءِ خاص رليف پيڪيج جو اعلان ڪيو وڃي، ھنن چيو ته سرڪاري ملازمن جا جائز مطالبا ڊگهي عرصي کان التوا جو شڪار آهن، جنهن سبب ملازمن ۾ بيچيني وڌي رهي آهي، هنن حڪومت کان مطالبو ڪيو ته ملازمن جا سمورا جائز مسئلا فوري طور حل ڪيا وڃن، ٻي صورت ۾ احتجاج جو دائرو وڌائي سڄي صوبي ۾ تحريڪ هلائي ويندي.