سجاول ۾ آپڪا ۽ ينگ پيرا ميڊيڪل ايسوسيئيشن جي سڏ تي احتجاج

سڪندر ميمڻ، فاضل سومرو، حاجي خميسو, نورل ميمڻ، منظور خواجه ۽ ٻين احتجاج ڪيو

سجاول (گلشيرميربحر) آل پاڪستان ڪلرڪ ايسوسيئيشن (ايپڪا) ۽ ينگ پيراميڊيڪل ايسوسيئيشن جي سڏ تي سول اسپتال سجاول ٻاهران ملازمن پاران مطالبن جي مڃتا لاءِ احتجاجي مظاهرو ڪيو ويو. احتجاج ۾ وڏي انگ ۾ سرڪاري ملازمن شرڪت ڪئي. مظاهري جي اڳواڻي سڪندر ميمڻ، فاضل سومرو، حاجي خميسو, نورل ميمڻ، منظور خواجه، فهيم ميمڻ، سعيد احمد عمراڻي، رضا خواجه ۽ عبدالرزاق ميمڻ ڪئي. ان موقعي تي خطاب ڪندي اڳواڻن مطالبو ڪيو ته وڌندڙ مهانگائي کي نظر ۾ رکندي ملازمن کي ڊي آر اي (DRA) الائونس ۽ هيلٿ الائونس ڏنو وڃي، مختلف الائونسز کي بنيادي پگهار ۾ ضم ڪيو وڃي ۽ پيٽرول سميت روزمرهه استعمال جي شين جون قيمتون گهٽائي عوام ۽ ملازمن کي رليف فراهم ڪيو وڃي. هنن چيو ته مهانگائي سبب ملازمن ۽ سندن خاندانن جي معاشي مشڪلاتن ۾ مسلسل اضافو ٿي رهيو آهي، تنهن ڪري حڪومت سندن جائز مطالبا فوري طور تسليم ڪري. اڳواڻن چيو ته مطالبا نه مڃڻ جي صورت ۾ احتجاج جو دائرو وڌايو ويندو.