ملير: شاهه لطيف درخشاں ۾ مين ڊسپوزل سيوريج لائن ويهجي وئي

سيڪٽر 17 بي سي اي مڪمل طور گندي پاڻي ۾ ٻڏي ويو، رهواسي سخت پريشان

ملير (رپورٽ: عبدالرشيد مورجھريو)ابراهيم حيدري ٽائون جي ڳتيل آبادي واري علائقي شاهه لطيف درخشاں واري ۾ مين ڊسپوزل سيوريج لائن جا ويهجي وڃڻ سبب سيڪٽر 17 بي سي اي مڪمل طور تي سيوريج جي گندي پاڻي ۾ ٻڏي ويو آهي، جنهن ڪري علائقي جي رهواسين کي سخت تڪليفن کي منهن ڏيڻو پئجي رهيو آهي. گهٽيون ۽ رستا گندي پاڻي سان ڀرجي ويا آهن، جنهن سبب اچ وڃ جو نظام سخت متاثر ٿيو آهي، جڏهن ته بدبو ۽ گندگي ماڻهن جي زندگي عذاب بڻائي ڇڏي آهي.رهواسين موجب ڪيترن ئي ڪلاڪن کان سيوريج جو پاڻي لڳاتار گهٽين ۽ گهرن ۾ داخل ٿي رهيو آهي، جنهن ڪري گهريلو سامان کي نقصان پهتو آهي ۽ مختلف بيمارين پکڙجڻ جو خطرو به وڌي ويو آهي. ٻار، عورتون ۽ بزرگ سڀ کان وڌيڪ متاثر ٿي رهيا آهن، جڏهن ته رهواسي پنهنجي مدد پاڻ تحت پاڻي ڪڍڻ جون ڪوششون ڪري رهيا آهن.ان سلسلي ۾ ٽائون ابراهيم حيدري جي جنرل ڪائونسلر حاجي محراب خان فوري نوٽيس وٺڻ جو مطالبو ڪندي چيو آهي ته لاڳاپيل ادارا فوري طور تي قدم کڻن ۽ هنگامي بنيادن تي سيوريج لائن جي مرمت ڪري پاڻي جي نيڪالي کي يقيني بڻائين. هن خبردار ڪيو ته جيڪڏهن بروقت ڪارروائي نه ڪئي وئي ته صورتحال وڌيڪ خراب ٿي سگهي ٿي. رهواسين حڪومت سنڌ ۽ بلدياتي ادارن کان مطالبو ڪيو آهي ته فوري طور تي عملي ۽ مشينري موڪلي مسئلي کي حل ڪيو وڃي ته جيئن عوام کي هن اذيتناڪ صورتحال مان ڇوٽڪارو ملي سگهي. واضح رهي ته شهر جي مختلف علائقن ۾ سيوريج نظام جي خراب حالت هڪ وڏو مسئلو بڻيل آهي، جنهن سبب اهڙا واقعا بار بار پيش اچي رهيا آهن. شهرين مطالبو ڪيو آهي ته مستقل بنيادن تي سيوريج سسٽم کي بهتر بڻايو وڃي ته جيئن مستقبل ۾ اهڙين تڪليفن کان بچي سگهجي۔