ٺارو شاهه واسڻ ناري جو امڙ سان گڏ احتجاجي مظاهرو

ڪجهه ڏينهن اڳ بااثر مون کي ۽ امڙ کي اغوا ڪري ويا هئا، شاهه رخ سولنگي زنا ڪئي ۽ شادي لاءِ دٻاءُ وجهندو رهيو: عشا سولنگي

نوشهرو فيروز(ڊ ر)ٺاروشاه جي رهواسڻ ناري عشا سولنگي پنهنجي والده گل بانو سولنگي سان گڏ نوشهرو فيروز پريس ڪلب آڏو احتجاج ڪندي چيو ته ڪجهه ڏينهن اڳ هوءَ پنهنجي ماءُ ۽ ڀاءُ ماجد سولنگي سان گڏ موٽر سائيڪل تي شهر وڃي رهي هئي ته اسپتال ڀرسان سندن موٽر سائيڪل جو تيل ختم ٿي ويو، جنهن بعد سندس ڀاءُ تيل وٺڻ لاءِ ويو. انهي دوران ڳوٺ وهري جا رهواسي شاهرخ سولنگي، طارق سولنگي، فياض سولنگي، لياقت سولنگي ۽ امتياز سولنگي ڪار ۽ موٽر سائيڪلن تي اچي کين زبردستي ڪار ۾ ويهاري اغوا ڪري ويا. جوابدار کين مختلف هنڌن تي وٺي ويندا رهيا جتي شاهرخ سولنگي هٿيارن جي زور تي ساڻس زيادتي ڪئي ۽ شادي لاءِ دٻاءُ وجهندا رهيو. متاثرہ ناري جو چوڻ هو ته بعد ۾ کين آزاد ڪيو ويو، جنهن بعد هو ٺاروشاه ٿاڻي تي ڪيس داخل ڪرائڻ لاءِ ويا، پر پوليس ايف آءِ آر داخل ڪرڻ کان انڪار ڪري ڇڏيو. انصاف نه ملڻ تي نوشهرو فيروز جي عدالت ۾ 22-A/B تحت درخواست داخل ڪرائي وئي آهي. درخواست داخل ٿيڻ کانپوءِ جوابدار کين موتمار ڌمڪيون ڏئي رهيا آهن. هن ۽ سندس والده اعليٰ اختيارين کان مطالبو ڪيو ته جوابدارن کي فوري گرفتار ڪري کين انصاف فراهم ڪيو وڃي، ٻي صورت ۾ احتجاج جو دائرو وڌايو ويندو.