ڪراچي ۾ بُهه جو بحران، سوين ٽرڪون 4 ڏينهن کان رڪيل، ڊيري فارمرز ۾ ڳڻتي جي لهر

ڪراچي ڊيري فارمرز ايسوسيئيشن پاران فوري طور تي ٽرڪن کي ڪراچي داخل ٿيڻ جي اجازت جو مطالبو

ملير (رپورٽر)ڪراچي ۾ ڀَھ (چاري) جو سخت بحران پيدا ٿي ويو آهي، جتي سجاول رستي کان ايندڙ ڀَھ سان ڀريل سوين ٽرڪون گذريل چئن ڏينهن کان سنڌو درياهه جي پل وٽ روڪيل آهن ڪراچي ڊيري فارمرز ايسوسيئيشن فوري طور تي ٽرڪن کي ڪراچي داخل ٿيڻ جي اجازت ڏيڻ جو مطالبو ڪيو آهي ايسوسيئيشن جي ترجمان غلام شبير ڊار چيو آهي ته ٽرڪن کي روڪڻ سبب شهر ۾ ڀَھ جي شديد کوٽ پيدا ٿي وئي آهي، جنهن سان چوپايو مال بک جو شڪار ٿي سگهي ٿو. هن خبردار ڪيو ته جيڪڏهن صورتحال برقرار رهي ته مالوند ماڻهن کي وڏو نقصان پهچي سگهي ٿو ٻئي طرف ڀَھ جي واپارين جو چوڻ آهي ته اوور لوڊنگ جي الزام هيٺ کين ڪراچي وڃڻ کان روڪيو پيو وڃي، جڏهن ته گذريل چئن ڏينهن کان گاڏيون بيهاري رکڻ سبب بحران وڌيڪ سنگين ٿي ويو آهي. هنن انتظاميا کان فوري نوٽيس وٺڻ جو مطالبو ڪيو آهي.واپارين موجب اڳ ۾ موٽر وي بند ڪئي وئي ۽ هاڻي سڄي سنڌ مان سجاول ٺٽو روٽ پڻ بند ڪيو ويو آهي، جنهن ڪري سپلاءِ جو نظام مڪمل طور متاثر ٿيو آهي. هنن الزام هنيو ته پوليس ٺٽي کان ڪراچي داخل ٿيڻ جي اجازت نه ٿي ڏئي، جيڪا وڏي زيادتي آهي.واضح رهي ته ڀَھ جي کوٽ سبب ڪراچي ۾ مالوند ماڻهو سخت پريشان آهن ۽ بحران ڏينهون ڏينهن وڌي رهيو آهي