پپري ۾ هٿياربندن هٿان هفتو اڳ پرڻيل نوجوان قتل ۽ ڀاءُ زخمي، قومي شاهراهه تي ڌرڻو

هٿياربندن فائرنگ ڪري سليم گوپانگ کي قتل ۽ سندس ڀاءُ رشيد کي مرڻينگ ڪري ڇڏيو

ملير (رپورٽ: عبدالرشيد مورجھريو) بن قاسم ٿاڻي جي حد پپري ۾ نامعلوم جوابدارن فائرنگ ڪري نوجوان سليم گوپانگ کي قتل ڪري ڇڏيو، جڏهن ته سندس ڀاءُ رشيد گوپانگ کي سخت زخمي ڪري ڇڏيو۔ ذريعن موجب مقتول جي هڪ هفتي اڳ ئي شادي ٿي هئي، جنهن سبب واقعي علائقي ۾ شديد ڏک ۽ ڪاوڙ پکڙجي وئي آهي۔اهلِ خانہ موجب مقتول ۽ سندس ڀاءُ کي هن کان اڳ به ساڳئي علائقي ۾ نامعلوم جوابدارن موٽر سائيڪل کان محروم ڪيو هو، جڏهن ته تازو واقعو به اهڙين وارداتن جو تسلسل قرار ڏنو پيو وڃي۔ وارثن جو چوڻ آهي ته علائقي ۾ ڏوهاري عنصر کلي عام گهمي رهيا آهن ۽ پوليس اثرائتي ڪارروائي ڪرڻ ۾ ناڪام نظر اچي رهي آهي۔واقعي خلاف وارثن ۽ علائقي واسين مقتول جو لاش رکي قومي شاهراهه تي ڌرڻو هنيو، جنهن سبب ٽرئفڪ جي روانگي سخت متاثر ٿي ۽ گاڏين جون ڊگهيون قطارون لڳي ويون۔بعد ۾ مقتول جي جنازي نماز پپري گرائونڊ ۾ ادا ڪئي وئي، جتي وڏي انگ ۾ علائقي واسين ۽ مائٽن شرڪت ڪئي۔ ان موقعي تي وارثن الزام هنيو ته علائقي ۾ منشيات فروش ۽ ڏوهاري عنصر کلي عام سرگرم آهن، جڏهن ته بن قاسم پوليس غفلت جو مظاهرو ڪري رهي آهي۔هنن مطالبو ڪيو ته قاتلن کي فوري طور گرفتار ڪري قانون جي ڪٽهڙي ۾ آندو وڃي، ٻي صورت ۾ احتجاج جو دائرو وڌائڻ جي وارننگ ڏني وئي آهي۔پوليس عملدارن موجب واقعي جي جاچ شروع ڪئي وئي آهي ۽ جوابدارن جي گرفتاري لاءِ ڇاپا هنيا پيا وڃن۔