ملير: داؤد شورو ڳوٺ ۽ ڀرپاسي وارن علائقن ۾ بنيادي سهولتن جي کوٽ، روڊ۽ سيوريج جو نظام تباهه

ملير (رپورٽ: عبدالرشيد مورجھريو) داؤد شورو ڳوٺ ۽ ان جي ڀرپاسي وارن علائقن ۾ بنيادي شهري سهولتن جي شديد کوٽ سبب رهواسي سخت ڏکائين کي منهن ڏئي رهيا آهن۔ علائقي واسين جو چون آهي ته هتي سيوريج، روڊن، پاڻي ۽ بجلي جهڙيون بنيادي ضرورتون سالن کان نظرانداز ٿيل آهن، جنهن سبب روزمره جي زندگي تمام گهڻي متاثر ٿي رهي آهي۔مقامي رهواسين موجب داؤد شورو قبرستان ڏانهن ويندڙ روڊ تي مسلسل سيوريج جو گندو پاڻي بيٺل رهي ٿو، جنهن سبب نه صرف آمدرفت ۾ ڏکيائي ٿئي ٿي پر بيمارين جي پکڙجڻ جو خطرو پڻ وڌي ويو آهي۔ هي علائقو نئشنل هاءِ وي جي بلڪل ويجهو هجڻ باوجود مڪمل طور تي نظرانداز ٿيل آهي رهواسين جو وڌيڪ چوڻ آهي ته متين ڪمپليڪس جي ڀرسان جيڪو روڊ اندروني ڳوٺن ۽ شاهه لطيف جي سيڪٽر 19-B طرف وڃي ٿي، ان جي حالت انتهائي خراب آهي۔ روڊ جڳهه جڳهه تان ٽٽل آهي ۽ سيوريج يا برساتي پاڻي سبب ڪيترن هنڌن تي گذرڻ به مشڪل ٿي ويو آهي۔مقامي ماڻهن اهو به شڪايت ڪئي آهي ته علائقي ۾ نه مناسب پاڻي جي فراهمي موجود آهي، نه بجلي جو نظام بهتر آهي، ۽ نه ئي روڊن جي مرمت لاءِ ڪو عملي قدم کنيو ويو آهي۔ گذريل 8 کان 10 سالن دوران نه ڪو چونڊيل ڪائونسلر علائقي ۾ آيو آهي ۽ نه ئي ڪو چيئرمين عوامي مسئلن کي ٻڌڻ لاءِ پهتو آهي۔عوام جو چوڻ آهي ته ترقياتي فنڊ باقاعدي جاري ٿيڻ باوجود زميني حقيقت ۾ ڪا به بهتري نظر نٿي اچي، جنهن سبب سوال پيدا ٿئي ٿو ته اهي فنڊ آخر ڪٿي خرچ ڪيا پيا وڃن۔وڌيڪ اهو ته ابراهيم حيدري ٽائون، يونين ڪائونسل چوڪنڊي جي ڪيترن ئي آبادي وارن علائقن ۾ سيوريج جو گندو پاڻي گهرن ۾ داخل ٿي ويو آهي، جنهن سان صورتحال وڌيڪ سنگين ٿي وئي آهي۔ گندي پاڻي سبب ٻارڙا، عورتون ۽ بزرگ سخت صحت جي خطرن کي منهن ڏئي رهيا آهن۔رهواسين اعليٰ اختيارين، چونڊيل نمائندن ۽ انتظاميه کان فوري نوٽيس وٺڻ جو مطالبو ڪيو آهي ۽ خبردار ڪيو آهي ته جيڪڏهن صورتحال بهتر نه ڪئي وئي ته احتجاج جو دائرو وڌايو ويندو۔