ملير ۾ سمنڊ ڪناري آباد چشما ڳوٺ بنيادي سهولتن کان محروم، ڳوٺاڻن جو احتجاج

فيروز خاصخيلي، حسن خاصخيلي، عبدالرحمن خاصخيلي، جمن خاصخيلي ۽ ٻين احتجاج ڪيو

ملير (رپورٽ: عبدالرشيد مورجھريو) ملير جي سامونڊي پٽي تي هڪ صدي کان وڌيڪ عرصي کان آباد چشما ڳوٺ اڄ به بنيادي انساني حقن ۽ سهولتن کان محروم آهي، جنهن سبب ڳوٺاڻن ۾ سخت بيچيني پکڙيل آهي۔ ڳوٺ واسين حڪومت ۽ چونڊيل نمائندن خلاف سخت احتجاج ڪندي خبردار ڪيو آهي ته جيڪڏهن سندن مسئلا حل نه ڪيا ويا ته هو احتجاج ڪرڻ تي مجبور ٿي پوندا۔ ڳوٺاڻن فيروز خاصخيلي، حسن خاصخيلي، عبدالرحمن خاصخيلي، جمن خاصخيلي ۽ احمد علي خاصخيلي ميڊيا سان ڳالهائيندي چيو ته چشما ڳوٺ گذريل هڪ صدي کان آباد آهي، پر اڄ تائين هتي رهندڙ ماڻهن کي پيئڻ جو صاف پاڻي، روڊ، نيڪال جو نظام، صحت ۽ تعليم جهڙيون بنيادي سهولتون فراهم نه ڪيون ويون آهن۔ هنن چيو ته هو هر چونڊ ۾ پاڪستان پيپلز پارٽي کي ووٽ ڏئي ڪامياب ڪرائيندا رهيا آهن، پر افسوس جو سندن علائقي کي نظرانداز ڪيو ويو آهي ۽ ترقياتي ڪم ناهن ڪرايا ويا۔ ڳوٺاڻن موجب برساتن دوران علائقو تلائن جو منظر پيش ڪندو آهي، جڏهن ته خراب رستن سبب عورتن، ٻارن ۽ بزرگن کي سخت تڪليفن کي منهن ڏيڻو پوي ٿو۔ هنن وڌيڪ چيو ته ڪيترائي ڀيرا چونڊيل نمائندن ۽ لاڳاپيل ادارن کي شڪايتون ڪيون ويون، پر اڄ تائين ڪو به عملي قدم نه کنيو ويو آهي۔ ڳوٺاڻن حڪومت سنڌ، ضلعي انتظاميا ۽ چونڊيل نمائندن کان مطالبو ڪيو ته چشما ڳوٺ کي ترت بنيادي سهولتون فراهم ڪري رهواسين جي احساس محرومي ختم ڪئي وڃي، ٻي صورت ۾ سخت احتجاجي تحريڪ هلائي ويندي۔