عمرڪوٽ پوليس ۾ اهم تبديلي، سهائي عزيز ٽالپر ايس پي عمرڪوٽ مقرر ايس پي عذير بدلي سي پي او ڪراچي رپورٽ ڪرڻ جو حڪم

عمرڪوٽ (رپورٽ:ڪانجي مل رکيسر) ضلعي عمرڪوٽ پوليس کاتي ۾ اهم تبديلي آندي وئي آهي، جنهن تحت سهائي عزيز ٽالپر کي نئين ايس پي عمرڪوٽ مقرر ڪيو ويو آهي، جڏهن ته اڳوڻي ايس پي عذير احمد جي بدلي ڪري کيس سي پي او ڪراچي رپورٽ ڪرڻ جو حڪم جاري ڪيو ويو آهي، جڏھن تہ عمرڪوٽ جي تاريخ ۾ پهريون ڀيرو ڪنهن عورت آفيسر کي ايس پي مقرر ڪيو ويو آهي، جنهن تي شهرين مختلف اميدن جو اظهار ڪيو آهي، شهرين جو چوڻ آهي ته عمرڪوٽ ۾ پابندي باوجود آئيس، هيروئن، چرس، شراب سميت ٻين منشيات جي کليل وڪري بابت ڊگهي عرصي کان شڪايتون سامهون اينديون رهيون آهن، هاڻي شهرين جون نظرون نئين ايس پي تي آهن ته هوءَ منشيات فروشن خلاف ڪهڙا عملي قدم کڻي ٿي ۽ قانون جي عملداري کي ڪيئن وڌيڪَ مضبوط بڻائي ٿي.