ٺٽي ويجهو جوابدارن ڪهاڙين جا وار ڪري هڪ ڍڳي کي ماري ڇڏيو، 4 زخمي

ٺٽو(ڊر) بي زبان جانورن کي نامعلوم وحشي انسانن پاران ڪھاڙيون ھڻي مارڻ سميت 5 ڳئون کي وڍي زخمي ڪري ڇڏيو. ڀاڳئين پاران انصاف جو مطالبو، تفصيل موجب چليا ويجهو ھالار چڙھي کان اندر برانچ موري وٽ سنڌو درياء جي ڪچي علائقي ٻيلي کاتي جي سرڪاري زمينن ۾ چرڻ لاء ويل سرڪي برادري جي 5 ڳئون کي نامعلوم وحشي ماڻھن پاران ڪھاڙيون ھڻي سخت زخمي ڪري ڇڏيو، جن مان الھڏنو ولد مقيم سرڪي جي ڳئون تڙپي، تڙپي موقعي تي مري ويئي، جڏھن تہ 4 ڳئون سخت زخمي ٿي پيون اھن، جن ۾ 3 ڳئون بلو ولد فقير محمد سرڪي جون آھن، جن کي سخت زخمي حالت ۾ مالڪن پاران سوزوڪي ۾ وجھي گھر آندو ويو آھي، جڏھن تہ ھڪ سخت زخمي ڳئون اڃان جاء واردات تي پيل آھي، جنھن جو بچڻ پڻ مشڪل بڻيل آھي، جانورن جي مالڪن ڪامريڊ نبي بخش سرڪي، وڏيرو خان محمد عرف خانو سرڪي ۽ ٻين چيو تہ اسانجو چوپايو مال ھر روز ٻيلي کاتي جي سرڪاري زمينن ڏانھن جھنگ ۾ چرڻ وڃي ٿو، جن بيلي کاتي جي زمينن جون سپريم ڪورٽ پاران ليزون بہ ڪينسل ٿيل آھن، جن زمينن تي مختلف ضلعن جي بااثر ماڻھن قبضا ڪري ورتا آھن، جن ماڻھن جي ھٿياربند ماڻھن پاران وڏو ظلم ڪري ڪھاڙيون ھڻي اسانجي بي زبان ھڪ ڳئون کي ماري ڇڏڻ سميت 4 ڳئون کي سخت زخمي ڪري ڇڏيو اھي، ھنن وس وارن کان گھر ڪئي آھي تہ فورن نوٽيس وٺي ساڻن انصاف ڪري سندن بي زبان جانورن کي زخمي ڪندڙ توڙي ماريندڙ سمورن نامعلوم جوابدارن کي گرفتار ڪري ساڻن انصاف ڪرڻ سميت ٻيلي کاتي جي زمينن تي ٿيل غيرقانوني قبضا خالي ڪرائي مال جا چراگاھ محفوظ ڪيا وڃن، ٻئي صورت ۾ سخت احتجاج ڪيو ويندو.