سنڌياڻي تحريڪ پاران راڻيپور ۾ نينگري فاطمھ واري لک ڪانڊاڙيندڙ واقعي جي مذمت

معصوم نياڻي فاطمه کي مبينا زيادتي بعد تشدد ڪري قتل واري واقعي انسانيت جو ڪنڌ جھڪائي ڇڏيو آھي: اڳواڻ

حيدرآباد (بيورو) سنڌياڻي تحريڪ جي مرڪزي صدر زينت سمون زاھد شيخ،نصرت خاصخيلي ناھيد جوڳي، رفيعہ پليجو، امير زادي برھماڻي، بختاور چنڊ آمنہ ڪنڀار راڻيپور ۾ پيراڻي حويلي ۾ ڪم ڪندڙ معصوم نياڻي فاطمه ڦرڙو کي وحشي جوابدار فياض شاھ زيادتي ڪرڻ بعد تشدد ڪري قتل واري واقعي تي انتھائي افسوس جو اظھار ڪندي چيو تہ راڻيپور وارو واقعو لڱ ڪانڊاريندڙ ۽ انتھائي بي حسي جو نتيجو آھي۔ هن واقعي اڄ انسانيت جو ڪنڌ شرم کان جهڪائي ڇڏيو آهي، هي واقعو سماج جي پدر شاهي نظام جو عڪس آهي، ڪيس جي گھڻ رخي جاچ ڪري جوابدار کي منطقي انجام تائين پھچائي سخت سزا ڏني وڃي ھنن اڳواڻن چيو تہ قانون جي حڪمراني سان عوام کي انصاف ملي سگھي ٿو۔ اسان وٽ جيڪو طاقتور آھي اھو قانون کي پنھنجي پيرن ھيٺان لتاڙي ٿو۔ ڪمزور عوام تي ظلم ڪري ٿو۔ قانون ۽ آئين ۾ سڀ برابر آھن معصوم ٻارڙن ۽ عورتن کي زيادتي ڪندڙن جوابدار کي بنا ڪنھن رعايت جي گرفتار ڪري کين سخت سزا ڏني وڃي ھا تہ اڄ نئون ڪوٽ جھڙو واقعو پيش نہ اچي ھا. سنڌ ۾ ڪڏھن تانيہ تہ نائلا رند ڪڏھن ڊاڪٽر نمرتا بيگناھ قتل ڪئي وڃي ٿي، جيڪو ڪجھ ڏينھن تائين ھاءِ پروفائل ڪيس رھي ٿو ۽ حڪمران روايتي طور تي نوٽيس وٺن ٿا ۽ جاچ جي نالي ۾ سڀني جو ڌيان ٻي طرف منتقل ڪري وري ڪا نئين ڪربلا سامھون اچي ٿي. ھنن اڳواڻن چيو تہ حڪمرانن سنڌ کي المناڪ سانحن جي سرزمين بنائي ڇڏيو آھي. ڪو قانون ناھي، تحفظ رڳو حڪمرانن کي آھي، سيڪيورٽي رڳو انھن لاءِ آھي، پوليس ۽ ٻيا ادارا متحرڪ ۽ خبردار رڳو حڪمران طاقتن لاءِ آھن، باقي عام ماڻھو قتل ٿيڻ کانپوءِ بہ انصاف کان محروم آھي. ڪا نہ ڪا سفارش، رشوت ۽ جرڳو خون لوڙھي ڇڏي ٿو ۽ انصاف کي خاڪ بنائي ڇڏي ٿو. سنڌ ۾ عورتن، معصوم ٻارن، اقليتن سان درندگي بند ڪئي وڃي. قانون سڀني لاءِ برابر آھي، انصاف سڀني لاءِ برابر آھي. ڪنھن بہ قتل يا جنسي ڏاڍائي جي واقعي کي غربت ۽ امير ھجڻ جي پسمنظر ۾ نہ ڏٺو وڃي، واقعي ۾ ملوث وحشي سمورن جوابدارن کي منطقي انجام تائين پھچايو وڃي. ھنن اڳواڻن وزير اعلي، چيف جسٽس ھاء ڪورٽ سنڌ کان مطالبو ڪيو آھي تہ فوري طور ھن وحشتناڪ واقعي جو نوٽيس وٺي معصوم فاطمه ڦرڙو جي خون سان انصاف ڪيو وڃي