ٺٽي ۾ سول سوسائٽي پاران فلسطيني مسلمانن جي حق ۾ احتجاجي ريلي ڪڍي وئي

عالمي دھشتگرد اسرائيل پنھنجي آقا امريڪا جي اشاري تي مظلوم فلسطينين تي ظلم ڪري رھيو آھي: اڳواڻ

ٺٽو (شفيق ڀٽي) ٺٽي ۾ سول سوسائٽي پاران فلسطيني مسلمانن جي حق ۾ ايڌي سينٽر کان ريلي ڪڍي وئي، ريلي قومي شاھراھ جو گشت ڪندي پريس ڪلب ٺٽي اڳيان پھتي جتي احتجاجي مظاھرو ڪيو ويو. ان موقعي تي پي ٽي آئي اڳواڻ عرفان ماڻڪاڻي، سماجي اڳواڻن راشد خشڪ، عبيد علي بُرفت، ياسر پنجواڻي، اعجاز ڪنڀار، شھزور چانگ، شاھد شاھ، سجاد کتري، اويس مغل ۽ ٻين چيو تہ اسرائيل عالمي دھشتگرد آھي جيڪو پنھنجي آقا امريڪا جي اشاري تي مظلوم فلسطينين تي ظلم ڪري رھيو آھي ھن غزہ ۽ والاريل بيت المقدس ۾ بربريت قائم ڪري ڇڏي آھي. ھنن چيو تہ اسرائيل کي ڪنھن بہ صورت ۾ بي پھچ مسلمانن جو رت وھائڻ جي اجازت نٿي ڏيئي سگھجي اسرائيل عالمي امن لاءِ ناسور بنجي ويو آھي. ھنن وڌيڪ چيو تہ مسلمان ملڪن کي گڏيل قومن کانسواءِ ھر فورم تي ھن ڏاڍ خلاف آواز اٿارڻ گھرجي ۽ فلسطيني ڀائرن جي مدد ڪرڻ گھرجي. احتجاج ۾ شھرين ۽ سماجي اڳواڻن بہ وڏي انگ ۾ شرڪت ڪئي.