قومي عوامي تحريڪ جي مرڪزن وفدن جون ڊي سيز ۽ ايس ايز پيز سان ملاقاتون

سپريم ڪورٽ جي حڪم تي عمل ڪري غير قانوني افغانين کي واپس پنھنجي ملڪ موڪليو وڃي: اڳواڻ

حيدرآباد/ ٺٽو/ بدين/ ميرپور خاص (رپورٽرز وٽان) قومي عوامي تحريڪ جي سربراھ اياز لطيف پليجو جي ھدايت تي پارٽي جي مرڪزي وفدن ٻئي ڏينھن بہ مختلف ضلعن جي ڊپٽي ڪمشنرن ۽ ايس ايس پيز سان ملاقات ڪري کين غير قانوني افغانين جي نيڪالي بابت اياز لطيف پليجي جو پيغام ڏنو ۽ تفصيلي ڳالھ ٻولھ ڪئي. ان ڏس ۾ ٺٽي ۾ قومي عوامي تحريڪ جي مرڪزي جنرل سيڪريٽري مظھر راھوجو، ياسر جاکرو، بشير ﷲ سمون، ممتاز علي شيخ، شبير ڀٽي، دانش خاصخيلي، شڪيل خاصخيلي جي اڳواڻي ۾ ايس ايس پي ٺٽو آفتاب نظاماڻي سان سندس آفيس ۾ ملاقات ڪري ٺٽي ضلعي ۾ غير قانوني موجود افغانين کي نيڪالي ڏيارڻ لاء پارٽي جو پيغام پھچايو وفد ايس ايس پي کان گھر ڪئي تہ ٺٽو پوليس قانوني موقعي جو فائدو وٺي افغان پناھگيرين کي فورن نيڪالي لاء پنھنجو ڪردار ادا ڪري جنھن تي ايس ايس پي وفد کي يقين ڏياريو تہ اسان ھن عمل کي عملي جامو پارائڻ جي ڪوشش ڪري رھيا آھيون. ٻئي طرف بدين ۾ قومي عوامي تحريڪ جي وفد سانول گوپانگ، رشيد گوپانگ، بچل احمداڻي حسين درس ۽ اسماعيل ملاح جي اڳواڻي ۾ ڊي سي بدين عبدالفتح ھليو ۽ ايس ايس پي بدين قمر رضا جسڪاڻي سان ملاقات ڪئي۔ ان موقعي تي قومي عوامي تحريڪ جي اڳواڻن چيو تہ غير قانوني افغانين کي نيڪالي ڏيڻ لاءِ نادرا ۽ ادارن جي مدد سان جلد آپريشن ڪيو وڃي. ڊي سي بدين ۽ ايس ايس پي بدين چيو تہ اليگل اميگرينٽس سان ڪا بہ رعايت نہ ڪئي ويندي. کين پڪڙي واپس پنھنجي ملڪ موڪليو ويندو. ھوڏانھن ميرپورخاص ۾ قومي عوامي تحريڪ جي وفد سنڌي ھاري تحريڪ جي صدر انور نوحاڻي، مجيد ٻگھيو، ڪامريڊ ڪرڙ ريٻاري، نثار ڀرڳڙي ۽ شوڪت نوحاڻي ڊپٽي ڪمشنر ميرپورخاص ۽ ڊي آء جي ميرپورخاص سان ڌار ڌار ملاقات ڪري کين چيو تہ سپريم ڪورٽ جي حڪم تي عمل ڪري غير قانوني افغانين کي واپس پنھنجي ملڪ موڪليو وڃي.ان موقعي تي ڊي آئي جي ميرپورخاص ۽ ڊي سي ميرپورخاص چيو تہ اليگل اميگرينٽس کي پڪڙڻ لاءِ حڪمت عملي جوڙي آھي، جلد ڪارروائي ڪئي ويندي.