ڪراچي جي منگهو پير ٽائون جي رھواسين جو بنيادي سهولتون جي اڻھوند خلاف ڌرڻو

36 views | 10th Dec 2023 • سنڌي خبرون

ڪراچي جي منگهو پير ٽائون جي رھواسين جو بنيادي سهولتون جي اڻھوند خلاف ڌرڻو

گڏاپ (محمد علي خاصخيلي )ڪراچي جي منگهو پير ٽائون جي رھواسين جو بنيادي سهولتون جي اڻھوند خلاف سياسي سماجي اڳواڻن. سول سوسائٽي. دڪاندارن علائقي جي رھواسين پاران درگاهه منگهو پير مين روڊ اڳيان احتجاجي مظاهرو ڪري مين روڊ کي ٽريفڪ لاءِ بند ڪري ڇڏيو. سالن کان وٺي مين روڊ جو ڪم سست رويي جو شڪار آھي. مين روڊ جو ڪم شروع نه ڪيو ويو ته احتجاج جو دائرو وسيع ڪنداسين. اڳواڻ تفصيل موجب ڪراچي جي منگھو پير ٽائون جي سياسي سماجي تنظيمن جي اڳواڻن. سول سوسائٽي سميت علائقي جي رھواسين جماعت اسلامي جي عبدالمجيد خاصخيلي. مسلم ليگ ن جي محمد ساجد. پي ٽي آءِ جي حاجي عبدالمنان. پيپلز پارٽي جي زنوارهاشمي. جميعت علماءِ اسلام جي امير ڊاڪٽر غلام بادشاه. پرائيويٽ اسڪول منگھو پير ٽائون جي ڊائريڪٽر عبدالله صديقي، پروفيسر عظمت الله شراڻي. پرنسپال نيشن اسڪول جي پرنسپل عبدالستار آفريدي.سماجي اڳواڻ وحيد پٺاڻ ۽ ٻين جي اڳواڻي ۾ منگھو پير درگاهه آڏو احتجاجي مظاهرو ڪيو. ان موقعي تي اڳواڻن خطاب ڪندي چيو ته سڄي ڪراچي ۾ ترقياتي منصوبا هلي رهيا آهن پر سنڌ جي وڏي ۾ وڏي آبادي رکندڙ منگهو پير ٽائون جو ڪم سالن کان سست رويي جو شڪار آھي. چونڊيل نمائندن 15 سالن کان منگهو پير ٽائون جا مسئلا حل ڪرڻ ۾ ڪا به دلچسپي ناھي ورتي. هن روڊ تي قائم مين مارڪيٽون بازارون تباهه ٿي ويون آهن. ڪاروبار مڪمل طور تي تباھ ٿي چڪو آهي. دڪاندارن جي گهرن ۾ فاقا ڪشي وارو ماحول اھي. هتان گذرندڙ گاڏين کي حادثا پيش اچي رھيا آھن اڌ ڪلاڪ جو سفر ڪلاڪن ۾ ٿئي ٿو. ايمرجنسي جي صورت ۾ اسپتال تائين نٿا پھچي سگھون ۽ جنھن ڪري ڪيتريون ئي جانيون ضايع ٿي ويون آهن. هن مين روڊ تي سنگ مرمر جا وڏا ڪارخانا آهن. پٿر سان ڀريل گاڏيون ڪلاڪن جا ڪلاڪ ڦاسي وڃن ٿيون. هن چيو ته منگهو پير ٽائون ۾ منشيات جو ڪاروبار کليل نموني هلي رهيو آهي. بنيادي سهولتون صحت تعليم. بجلي، گيس ۽ روڊ رستن جي کوٽ آھي. ان سڄي صورتحال جا ذميوار ھتان جا چونڊيل نمائندا ملوث اھن. جيڪي اقتدار ۾ اچي مسئلا حل ڪرڻ بدران ڪرپشن ڪرڻ ۾ پورا آھن. منگھو پير ٽائون کي لاوارث حالت ۾ ڇڏيو ويو آھي. ھنن چيو ته مين روڊ جو ڪم جلد شروع نه ڪرايو ويو ته اسين مرحلي وار تحريڪ شروع ڪنداسين. مظاهرين اعلي اختيارين کان فوري طور نوٽيس وٺي منگھو پير جي روڊ سميت بنيادي مسئلا حل ڪرائڻ جو مطالبو ڪيو آهي.