صحافت ھڪ مقدس ۽ عظيم پيشو ھُئڻ سان گڏ رياست جو چوٿون ٿنڀ آهي: محفوظ علي سومرو

136 views | 22nd Jan 2024 • سنڌي خبرون

صحافت ھڪ مقدس ۽ عظيم پيشو ھُئڻ سان گڏ رياست جو چوٿون ٿنڀ آهي: محفوظ علي سومرو

ٺٽو(شفيق ڀٽي) ڊسٽرڪٽ انفارميشن آفيسر محفوظ علي سومرو چيو آهي ته صحافت ھڪ مقدس ۽ عظيم پيشو ھُئڻ سان گڏ رياست جو چوٿون ٿنڀ آهي، مثبت صحافت عوامي فلاح، خدمت خلق ۽ معاشري جي غريب مظلوم ۽ پيسيل طبقي جو آواز بڻجڻ جو ذريعو آهي. اهڙين ڳالهين جو اظهار هُن پريس ڪلب گهارو جي سال 2024 لاءِ چونڊيل نئين باڊيء جو اعلان ڪرڻ بعد ڳالهائيندي ڪيو. ڊسٽرڪٽ انفارميشن آفيسر محفوظ علي سومرو چيو ته پريس ڪلب گهارو جي سمورن صحافين هميشه پنهنجا پيشيوراڻه فرض احسن طريقي سان انجام ڏنا آهن ۽ اميد ته آئنده به پنهنجو غيرجانبدار ڪردار بهتر نموني ادا ڪندا. هُن چيو ته مثبت صحافت ۽ خلق جي خدمت واري جذبي سان صحافي معاشري ۾ اهم ڪردار ادا ڪري سگهي ٿو، اسان سڀني کي پنهنجي علائقي جي تعمير، ترقي ۽ خوشحالي لاءِ عملي ڪردار ادا ڪرڻ گهرجي. ان موقعي تي ڊسٽرڪٽ انفارميشن آفيسر محفوظ علي سومرو ۽ اسسٽنٽ عبدالشڪور ميمڻ پريس ڪلب گهارو جي نون چونڊيل صدر ذوالفقار خاصخيلي، نائب صدر بابن آشواڻي، جنرل سيڪريٽري سيد عمران علي ۽ ٻين سمورن عهديدارن کي سنڌ جي روايتي سوکڙي اجرڪ جا تحفه پيش ڪندي مُبارڪباد پڻ ڏني. ان کان اڳ ڊسٽرڪٽ انفارميشن آفيسر محفوظ علي سومرو اسسٽنٽ عبدالشڪور ميمڻ سان گڏ گهارو پريس ڪلب پهچي نون چونڊيل صدر مختيار لاشاري، نائب صدر عبدالحمید عمراڻي ، جنرل سيڪريٽري شفيق چانڊيو ۽ ٻين کي مبارڪباد ڏني ۽ اجرڪ جا تحفه پڻ پيش ڪيا. ان موقعي تي محفوظ علي سومرو چيو ته صحافي برادري کي گهرجي ته هو هڪ ٻئي کان اڳيان نڪرڻ جي ڊوڙ بدران پنهنجي علائقي جي پيسيل طبقي جو آواز بڻجن ۽ عوام جي بھتري لاءِ ڪليدي ڪردار ادا ڪن. بعد ۾ هُنن نيشنل پريس ڪلب گهارو جو دورو ڪري صدر عبدالقادر پنهور، نائب صدر امجد ڀٽي ، جنرل سيڪريٽري خالد عزيز جتوئي ۽ ٻين صحافين سان ملاقات ڪئي ۽ صحافين جي مسئلن ۽ ٻين مختلف معاملن تي ڳالھ ٻول پڻ ڪئي