نوشهرو فيروز ۾ خوراڪ جي عالمي ڏينهن جي حوالي سان انتظاميه پاران آگاهي ريلي ڪڍي وئي

سنڌ حڪومت عوام کي صاف خوراڪ جي فراهمي لاءِ فوڊ اٿارٽي قائم ڪئي آهي: اي ڊي سي لياقت علي لنڊ

نوشهرو فيروز (ڊ ر) خوراڪ جي عالمي ڏينهن جي حوالي سان ضلعي انتظاميا ۽ سنڌ فوڊ اٿارٽي پاران ڊپٽي ڪمشنر آفيس کان ايڊيشنل ڊپٽي ڪمشنر لياقت علي لنڊ جي اڳواڻي ۾ آگاهي ريلي ڪڍي وئي. ان موقعي تي ايڊيشنل ڊپٽي ڪمشنر ٽو محمد مستقيم قريشي، اسسٽنٽ ڊائريڪٽر سنڌ فوڊ اٿارٽي سلطان مهيسر، فوڊ سيفٽي آفيسر نوشهروفيروز عمارا فريد خانزاده ۽ ٻيا آفيسر ۽ شهري موجود هئا. ان موقعي تي ريلي جي شرڪت ڪندڙن ۽ ميڊيا جي نمائندن سان ڳالهائيندي ايڊيشنل ڊپٽي ڪمشنر لياقت علي لنڊ چيو ته سنڌ حڪومت عوام کي صاف خوراڪ جي فراهمي لاءِ فوڊ اٿارٽي قائم ڪئي آهي. ضلعي انتظاميه فوڊ اٿارٽي سان مڪمل تعاون ڪندي. ۽ تمام جلد ضلعي ۾ ناقص شين جو وڪرو ڪندڙ دڪاندارن خلاف ڇاپا هنيا ويندا. هن عوام کي اپيل ڪئي ته اهي دڪاندارن ۽ واپارين جي نشاندهي ڪن جيڪي غير معياري شيون وڪرو ڪن ٿا. ته جيئن انهن خلاف ڪارروائي ڪري سگهجي. ان موقعي تي فوڊ اٿارٽي جي اسسٽنٽ ڊائريڪٽر ٻڌايو ته نوشهروفيروز ضلعي ۾ ملاوٽ وارين شين کي روڪڻ لاءِ ڇاپا هنيا ويا آهن، پهرين مرحلي ۾ دڪاندارن کي غير معياري شين جو وڪرو روڪڻ لاءِ نوٽيس جاري ڪري ڏنڊ لاڳو ڪيو ويو آهي. ڊسٽرڪٽ فوڊ سيفٽي آفيسر عمارا فريد جو چوڻ هو ته ضلعي جي مختلف علائقن ۾ کاڌي پيتي جي دڪانن ۽ هوٽلن جو معائنو ڪيو ويو آهي، جتي صفائي سٿرائي جا ناقص انتظام ھئا انهن هوٽلن ۽ دڪانن کي هدايتون ڏنيون ويون آهن ته صفائي سٿرائي کي بهتر بڻائڻ لاءِ سخت قدم کنيا پيا وڃن کير ۽ ٻين کاڌي پيتي جي شين ۾ ملاوٽ کي روڪڻ لاءِ قدم کنيا ويا آهن.