ڪينجھر ۾ چاڙهه بعد جھمپير لڳ 150 گھرن تي مشتمل ڳوٺ لال بخش منڇري ملاح مڪمل پاڻي ھيٺ

ڳوٺاڻا عارضي طور لڏپلاڻ ڪري ڳوٺ ڇڏي ويجهو ئي جابلو ٽڪري تي پهچي پناھ ورتي

ٺٽو( شفيق ڀٽي) نوري ڄام تماچي جي عشقيہ داستان سان وابسطہ نيري پاڻي جي وڏي ڍنڍ ڪينجھر ۾ پاڻي وڌڻ ڪري جھمپير لڳ 150 گھرن تي مشتمل ڳوٺ لال بخش منڇري ملاح ڪينجھر ڍنڍ جي مڪمل پاڻي ھي گھيري ۾ اچڻ ڪري ڳوٺاڻا عارضي طور لڏپلاڻ ڪري ڳوٺ ڇڏي ويجهو ئي جابلو ٽڪري تي اچي پناھ وٺي آباد ٿيا آهن، پر انتظاميہ اڃان تائين ڪوبہ تحرڪ ناھي ورتو، ان سلسلي ۾ متاثر ڳوٺاڻن حاجي گلو منڇري جي اڳواڻي ۾ عورتن، مردن ۽ معصوم ٻارڙن سقن گڏ سخت احتجاج ڪندي چيو ته ھو ڪينجھر ڍنڍ ۾ اضافي پاڻي اچڻ ڪري سخت مشڪلاتن کي منهن ڏئي رهيا آهن،

ھڪ طرف کين ڪابہ بنيادي سھوليت ميسر ناھي تہ مٿان وري ڪينجھر ڍنڍ ۾ اضافي پاڻي سندن گھرن کي گھري ويو اھي، جنھن مان نڪرڻ مشڪل بڻھي ويو اھي، جنھن ڪري لڏپلاڻ ڪري جابلو ٽڪري تي عارضي رھائش اختيار ڪئي اھي، پر کين ھيتري ايندڙ تڪليفن ۾ بہ سندن ڪير سار لھڻ وارو ناھي، ھنن چيو تہ اسان سدائين پ پ کي ووٽ ڏيندا آهيون، پر ڪنهن به چونڊيل نمائندي توڙي ضلعي انتظاميہ سندن سار ناھي لڌي،

هنن ڊي سي ٺٽو، ايم اين اي صادق علي ميمڻ، صوبائي وزير اوقاف سيد رياض علي شاه شيرازي کان مطالبو ڪيو ته سندن ڳوٺ کي چئوطرف بند ڏياري ڳوٺ کي پاڻي کان محفوط بڻائي کين عارضي طور رھائش لاء ٽينٽ مهيا ڪري سندن مالي مدد ڪرڻ سان گڏ کين بنيادي سھولتون روڊ، رستو، بجلي مھيا ڪري پريشاني کان بچايو وڃي، جيئن ھو وڌيڪ تڪلفين کان بچي سگھن.