شڪارپور ۾ ھٿياربند چانھه ڪمپني جي ملازمن کان لکين رپيا ڦر ڪري فرار، واپارين ۽ شهرين پاران ڌرڻو

شاھد علي سومرو ۽ ڌڻي بخش سومرو کان ھٿيارن جي زور تي 6 لک 50 ھزار کان وڌيڪ رقم ڦر

شڪارپور( احسان ابڙو ) شڪارپور وچ شھر مان ھٿياربندن پاران چانھ ڪمپني جي ملازمن کان لکين رپيا ڦر، خبر موجب شڪارپور شھر ۾ امن قائم نه ٿي سگھيو ھٿيار بندن پاران شھر جي وچ مان جھاز چوڪ جي ڀرسان ٽپال چانھ ڪمپني جي ملازمن شاھد علي سومرو ۽ ڌڻي بخش سومرو کان 3 نامعلوم ھٿياربند ڏوھاري ھٿيارن جي زور تي کين يرغمال بڻائي وچ شھر مان 6 لک 50 ھزار کان وڌيڪ رقم ڦر ڪري فرار ٿي ويا، نجي ڪمپني جي ملازمن موجب اسان روز جي معمول موجب شھر جي بازارن مان رڪوري ڪري واپس جھاز چوڪ تي دڪان طرف چنگچي تي سوار ٿي جھاز چوڪ تي دڪان طرف اچي رھيا ھئاسين ته جھاز چوڪ ڀرسان چنگچي ۾ سوار ٻن ڏوھارين ۽ موٽرسائيڪل تي سوار سندن ساٿي ھٿياربند ھٿيارن جي زور تي يرغمال بڻائي ھڪ ڄڻي ڌڻي بخش سومرو کي زخمي ڪري 6 لک 50 ھزار کان مٿي روڪ رقم کسي ٽئي جوابدار فرار ٿي ويا، واقعي خلاف واپارين ۽ شھرين پاران روڊ بلاڪ ڪري ۽ ڌرڻو ھنيو ويو، جنھن سبب ايندڙ ويندڙ ٽريفڪ معطل ٿي وئي، ڦر واقعي ۽ بدامني خلاف متاثرن ۽ شھرين سخت نعريبازي ڪئي، جنھن بعد ڊي آء بي انچارج سيد شاھجھان شاھ ۽ ايس ايڇ او نيوفوجداري گلزار ٻرڙو مظاھرين سان ڳالھيون ڪرڻ لاء پھتا ۽ شھرين کان جوابدار گرفتار ڪرڻ ۽ ڦر ٿيل سامان رڪور ڪرائڻ جي خاطري ڪرائي، جنھن بعد ڌرڻو ختم ڪيو ويو، ياد رھي ته ڪجھ عرصو اڳ به ٽپال چانھ ڪمپني جي شاپ تان ڏوھاري 10 لک رپين کان وڌيڪ رقم ڦر ڪري فرار ٿي ويا ھئا.