جسقم پاران سنڌ دشمن منصوبن خلاف سکر کان نڪتل پيادل مارچ جي گهگهر ۽ گلشن حديد ۾ شاندار آجيان

قافلي ۾ شامل اڪثر اڳواڻن ۽ ڪارڪنن جا پير پٿون، پر سندن حوصلا ڏسڻ وٺان

ملير(عبدالرشيد مورجھريو)جيئي سنڌ قومي محاذ طرفان سنڌو درياء مان 6 نوان ڪئنال ڪڍڻ، سنڌ جون زمينون ڪارپوريٽ فارمنگ لاءِ ڏيڻ ۽ سنڌ جي وسلين جي ڦرلٽ خلاف سکر کان شروع ٿيل پيادل لانگ مارچ جسقم چيئرمين اسلم خيرپوري اشرف ڀھليم، اسد سنڌ يار، فتح چنا، ڪرن نظاماڻي، ۽ ٻين جي اڳواڻي ۾ 24 ھين ڏينهن گھگھر رستي ڪراچي جي حدن ۾ داخل ٿيو ته مختلف سياسي ڌرين جسقم ڪارڪنن ۽ علائقي جي رھواسين وڏي تعداد ۾ گڏ ٿي قافلي جي شاندار آجيان ڪئي، ان موقعي تي پانڌيئڙن تي گلن جي ورکا ڪري اڳواڻن کي ھار ۽ عورتن کي اجرڪون پارايون، آجيان ڪندڙن ۾ بشيران زھراڻي، رشيد کوسو، وقار ڪوري، سانول زهراڻي، مڪيش ڪمار، عرفان زھراڻي، سميت جي يو آء جا ڪارڪن پڻ شامل ھئا، قافلي ۾ شامل پانڌيئڙن ۾ شامل اڪثر ڪارڪنن جا پير پٿون ٿيل ھئا، گھگھر ۾ آجيان کان پوء قافلو شام ڌاري گلشن حديد پھتو جتي وک وک تي قافلي جي آجيان ڪئي وئي، ان موقعي تي جسقم آريسر جي چيئرمين اسلم خيرپوري وڏي ميڙ کي خطاب ڪندي چيو ته، سنڌ بچائڻ نڪتا آھيون سڄي سنڌ کي اسان جو آواز ورنائڻ گھرجي، ڪئنال ٺھي ويا ته انساني آبادي ھڪ طرف پر سموري جيوت، زراعت، درياءَ، وڻ ٽڻ، تباھ ٿي ويندا، ھن چيو ته پنجاب هوڏ ڪري سنڌو درياءَ جو پاڻي چورائڻ لاءِ ڪئنال ٺاھي رھيو آھي، سنڌو اسان جو جياپو آھي، سمنڊ ۾ پاڻي ڇوڙ نه ٿيڻ سبب لکين ايڪڙ زمين تباھ ٿي ويندي، ھن چيو ته ڪارپوريٽ فارمنگ سنڌ جون زمينون ڦٻائڻ جو جو منصوبو آھي اسان سنڌو جا وارث آھيون، پنھنجا وسيلا بچائڻ لاءَ رت جي آخري ڦڙي تائين وڙهنداسين، ھن سنڌي ماڻھن کي سڏ ڏيندي چيو ته پٽڪي کي ور ڏيئي ميدان تي نڪري پئو، اسان کي سنڌين جي مرضي کانسواءِ ڪوبه فيصلو منظور ناھي، ھن ڪراچي ۾ رھندڙ سنڌين کي اپيل ڪئي ته 23 فيبروري تي سنڌو درياءَ ۽ سنڌ جا وسيلا بچائڻ لاء ڪراچي پريس ڪلب پھچي اتحاد ۽ ٻڌي جو ثبوت ڏيو پيادل قافلو رات گلشن حديد ۾ رھي اڄ صبح جو اڳين منزل ڏانھن روانو ٿيندو،