ملير: ايس ٽي پي پاران اعجاز سامٽيو ۽ ٻين جي شموليت تي آجياڻي جي تقريب

ملير (رپورٽ: عبدالرشيد مورجھريو) سنڌ ترقي پسند پارٽي گڏاپ ٽائون طرفان اعجاز سامٽيو، عابد ڀيو، جمال مگسي کي ساٿين سميت پارٽي ۾ ٻيهر شموليت ڪرڻ تي گهگهر ۾ آجياڻو ڏنو ويو، آجياڻي تقريب ۾ ملير سميت ڪراچي جي مختلف علائقن مان اڳواڻن ۽ ڪارڪنن وڏي تعداد ۾ شرڪت ڪئي، ان موقعي تي اعجاز سامٽيو خطاب ڪندي چيو ته مون سياست جي شروعات ايس ٽي پي کان ڪئي هئي هي منهنجي استاد پارٽي آئون سمجهان ٿو ته پنهنجي گهر موٽي آيو آهيان، هن چيو ته سنڌ هن وقت تمام ڏکئي وقت مان گذري رهي آهي سنڌ جي زمينن تي تيزيءَ سان والار ڪري درياهه جو رخ موڙيو پيو وڃي، جنهن کي عوامي جدوجهد سان بچائي سگهجي ٿو، وقت جي حڪمرانن کي ماضيءَ مان سکڻ گهرجي جڏهن ڪالا باغ ڊيم جي رٿا پيش ڪئي وئي ته ان کي به سنڌي قوم منظم جدوجهد ذريعي ختم ڪري ڇڏيو هي ڪئنالن وارو منصوبو ته ڪالاباغ ڊيم کان به وڌيڪ خطرناڪ آهي تڏهن ته هن معاملي تي سموري سنڌ سجاڳ ٿي پئي آهي ۽ روزاني مختلف علائقن شهرن، ڳوٺن ۾ ڪئنالن خلاف احتجاج ٿي رهيا آهن، هن اعلان ڪيو ته 13 مارچ تي گهگهر لڳ ڪراچي ٺٽو قومي شاهراهه تي ڌرڻو هنيو ويندو هن ڪراچي جي سنڌي ماڻهن کي گذارش ڪئي ته ڌرڻي ۾ وڌ کان وڌ شرڪت ڪن، جڏهن ته تقريب کي خير محمد مگسي، پير بخش بهلڪاڻي، اصغر سبزوئي ،راڻو خان زهراڻي ۽ ٻين خطاب ڪيو