وفاقي بجيٽ کي رد ڪريون ٿا، ان ۾ عوام لاءِ ڪجھ به ناھي: اياز لطيف پليجو

قومي عوامي تحريڪ پاران اڄ سجاول ضلعي ۾ سنڌ دشمن رٿائن ۽ پاڻي کوٽ خلاف مارچ ڪيو ويندو

حيدرآباد (بيورو)قومي عوامي تحريڪ پاران سڀاڻي (اڄ) شام 4 وڳي ميرپور بٺورو شھر ۾ ڪئنالن جي خاتمي، ڪارپوريٽ فارمنگ، سجاول ضلعي ۾ پاڻي جي ھٿرادو کوٽ ۽ سجاول ضلعي اندر وڌندڙ بدامني خلاف قومي عوامي تحريڪ جي سربراھ اياز لطيف پليجو جي اڳواڻي ۾ اڇي موري کان پيادل شارٽ مارچ ڪري مين بس اسٽاپ ميرپور بٺورو وٽ جلسي عام ڪيو ويندو ، 16 جون تي بدين شھر ۾ اياز لطيف پليجو جي اڳواڻي ۾ ريلي ڪڍي جلسي عام ڪيو ويندو. ھوڏانھن اياز لطيف پليجي وفاقي بجيٽ کي رد ڪندي چيو آھي تہ بجيٽ ۾ عوام لاءِ ڪجھ بہ ناھي، وفاقي حڪومت مھنگائي تي ضابطو نہ آندو آھي. پگھارن ۽ پينشنز ۾ ملازمن کي مايوس ڪيو ويو آھي، بجيٽ ۾ سرڪاري ملازمن جي پگھارن ۾ 50 سيڪڙو ۽ پينشن ۾ 30 سيڪڙو اضافو ڪيو وڃي. اياز لطيف پليجي چيو تہ عوام مٿان ناجائز ٽئڪس جو بار وڌو ويو آھي. حڪمران طبقي ۽ بيوروڪريسي کي بادشاھي مراعتون ڏنيو ويون آھن..آئي ايم ايف جي چوڻ تي عوام دشمن بجيٽ تيار ڪئي وئي آھي. تعليم ۽ صحت کي نظرانداز ڪرڻ عوام دشمني آھي. اياز لطيف پليجي چيو تہ ملڪ کي ٻاھرين ڊڪٽيشن تي ھلائڻ ڪري اسان جون پاليسيون آزاد، خودمختيار ۽ عوام دوست ناھن. عالمي مالياتي ادارا پنھنجن مفادن واريون پاليسيون جوڙين ٿا ۽ پاڪستان کي بحرانن جي ڪن ۾ اڇلائي رھيا آھن. اياز لطيف پليجي چيو تہ جن ايوانن ۾ قانون سازي ٿيڻ گھرجي، ملڪ ۽ عوام جي بهتريءَ جا فيصلا ٿيڻ گھرجن، بک، بدحالي ۽ بيروزگاري جي خاتمي، معاشي ۽ تعليمي ترقي لاء منصوبابندي ٿيڻ گھرجي، اتي عوام جا چونڊيل نمائندا صرف پنھنجون مراعتون وڌائن ٿا. ڪرپشن جي تحفظ ڏين ٿا. پوائنٽ اسڪورنگ ڪن ٿا. انھن جي روين ۾ ڪا سنجيدگي ۽ عوام دوستي ناھي. ماڻھن سوال ڪري رھيا آھن تہ اسان جي قسمت جو فيصلو ھي ڪندا، جن کي وڌندڙ غربت، مھانگائي، بک، بيروزگاري، بدامني ۽ بدحالي تي ڳالھائڻ لاءِ وقت ناھي۔ اياز لطيف پليجي چيو تہ سنڌ جا شھر ڪچري جو ڍير ۽ ٻھراڙيون کنڊر بنيل آھن۔ جيڪي شھر موجود آھن، سنڌ حڪومت کي انھن جي ترقي جو ڪو فڪر ناھي۔ ساحلي پٽي ۾ لکين آبادي بنيادي انساني سھولتن کان محروم آھي. پاڻي کوٽ جي ڪري آباد زمينون بنجر ٿي رھيون آھن.