ڌاٻيجي ۾ هٿياربند نوجوان کي گوليون هڻي زخمي ڪرڻ بعد فرار

پوليس ڏوهارين خلاف ڪارروائين بدران ننڊ سُتل آهي: زخمي جا وارث

ٺٽو (شفيق ڀٽي )ڌاٻيجي ۾ امن امان جي صورتحال وڌيڪ خراب ٿيندي پئي وڃي، سومرو پمپ ڀرسان نامعلوم هٿياربند موٽر سائيڪل سوارن فائرنگ ڪري مقامي نوجوان شاهزيب شاهه بخاري کي سخت زخمي ڪري ڇڏيو. فائرنگ بعد جوابدار آسانيءَ سان فرار ٿي ويا، جڏهن ته زخمي کي فوري طور رورل هيلٿ سينٽر گهارو منتقل ڪيو ويو، جتي سندس حالت ڳڻتي جوڳي ٻڌائي پئي وڃي.زخمي نوجوان جي وارثن ميڊيا سان ڳالهائيندي الزام لڳايو ته ايس ايڇ او مبين پرھياڙ ۽ سندس ٽيم سڄو ڏينهن منشيات فروشن جي سهولتڪاريءَ ۾ لڳل آهي، جنھن سبب عام ماڻهو غير محفوظ ٿي ويا آهن. هنن خبردار ڪيو ته جيڪڏهن اسان جي ماڻھوءَ کي ڪجهه به ٿيو ته ان جو ذميوار موجوده ايس ايڇ او هوندو. هوڏانهن علائقي جي سياسي ۽ سماجي حلقن به سخت ردعمل ڏيندي چيو آهي ته ڌاٻيجي ۾ ڏوهارين جا حوصلا بلند ٿي ويا آهن، ماڻهو پنهنجن جانين ۽ مال بابت سخت پريشان آهن. هنن ايس ايس پي ٺٽو کان مطالبو ڪيو ته نااهل ايس ايڇ او کي فوري طور هٽائي علائقي ۾ ايماندار ۽ فرض شناس آفيسر مقرر ڪيو وڃي. شهرين سنڌ جي گهرو وزير، آءِ جي سنڌ ۽ ٻين اعليٰ اختيارين کان گهر ڪئي آهي ته هو ڌاٻيجي جهڙي حساس علائقي ۾ پوليس جي غفلت ۽ خاموشيءَ جو نوٽيس وٺن ۽ مقامي ماڻهن کي تحفظ فراهم ڪن، ٻي صورت ۾ ايندڙ ڪنهن به ان وڻندڙ واقعي جي ذميواري سڌيءَ ريت لاپرواه آفيسرن تي هوندي.