ڪنري ٽائون ڪميٽي پاران 51 ڪروڙ 43 لک 95 هزار 828 رپين جي بچت واري بجيٽ منظور

عمرڪوٽ(رپورٽ:ڪانجي مل رکيسر) ڪنري ٽائون ڪميٽي طرفان 51 ڪروڙ 43 لک 95 هزار 828 رپين جو بچت وارو بجٹ پيش ڪيو ويو، جنهن ۾ ترقياتي ڪمن لاءِ 13 ڪروڙ کان وڌيڪ رقم مختص ڪئي وئي آهي۔ تفصيل موجب، ڪنري ٽائون ڪميٽي جي چيئرمين حاجي شڪيل احمد باجوه ٽائون ڪميٽي ڪنري جو سال 2025-26 جو 51 ڪروڙ 43 لک 95 هزار 828 رپين جو بچت وارو بجيٽ پيش ڪيو، ايون کان بجيٽ جي منظوري کان پوءِ ڪونسلر، عمران مغل، ساجد عزيز، سيد منظور علي شاه، عمران ايف ايم، ذوهیب امجد آرائين، محمد ضياء منا، جاويد ۽ ٻين سڀني ڪائونسلرن جي موجودگيءَ ۾ چيئرمين حاجي شڪيل احمد باجوه ميڊيا کي بريفنگ ڏيندي ٻڌايو ته خرچن جو تخمينو 51 ڪروڙ 41 لک 64 هزار 480 رپيا لڳايو ويو آهي، اهڙيءَ ريت بجيٽ ۾ 2 لک 31 هزار 348 رپين جي بچت ڏيکاري وئي آهي۔ هن ٻڌايو ته بجيٽ ۾ پگهارن لاءِ 24 ڪروڙ 95 لک 78 هزار رپيا، مرمت لاءِ 1 ڪروڙ 63 لک رپيا، ترقياتي ڪمن لاءِ 13 ڪروڙ 82 هزار 864 رپيا رکيا ويا آهن، جڏهن ته ٽائون ڪميٽي جو موجوده بيلنس 1 ڪروڙ 60 لک 55 هزار رپيا ظاهر ڪيو ويو آهي۔ چيئرمين حاجي شڪيل احمد باجوه ميڊيا سان ڳالهائيندي وڌيڪ چيو ته شهر جي مارڪيٽن، بازارن ۽ گهٽين ۾ پيور بلاڪ ذريعي وڌيڪ نيون روڊون تعمير ڪيون وينديون، پراڻين نالن جي مرمت ڪئي ويندي ۽ جتي نون نالن جي ضرورت هوندي، اتي نوان نالا ۽ ناليون تعمير ڪيون وينديون۔ هن ٻڌايو ته اسان جي ميمبر صوبائي اسيمبلي جي ڪوششن سان واٽر سپلاءِ فيز ٿري اسڪيم منظور ٿي چڪي آهي، جيڪا جلد نئين مرچ منڊي ڀرسان تعمير ڪئي ويندي۔