سنڌي شاگرد تحريڪ(ڪيو اي ٽي) پاران ٻن ڏينهن لاءِ ڪتابي ميلو ۽ ميمبرشپ ڪيمپ لڳائي وئي

سنڌ، مھراڻ ۽ لياقت ميڊيڪل يونيورسٽين جي شاگردن، شاگردياڻين، استادن ڪتابي ميلو ۾ پھچي ڪتاب خريد ڪيا

ڄامشورو (رپورٽر) سنڌي شاگرد تحريڪ(ڪيو اي ٽي) پاران سنڌ يونيورسٽي ۾ سينٽرل لائبريري ڀرسان ٻن ڏينهن لاءِ ڪتابي ميلو ۽ ميمبرشپ ڪيمپ لڳائي وئي سنڌ يونيورسٽي، مھراڻ يونيورسٽي، لياقت ميڊيڪل يونيورسٽي جي شاگردن، شاگردياڻين، استادن ڪتابي ميلو ۾ پھچي وڏي تعداد ڪتاب خريد ڪيا. مختلف يونيورسٽين جي شاگردن ميمبر شپ ڪئمپ تي پھچي 100 کان مٿي شاگردن سنڌي شاگرد تحريڪ شامل ٿي ميمبر شپ ڪرائي. ان موقعي تي خطاب ڪندي سنڌي شاگرد تحريڪ سنڌ يونيورسٽي جي صدر عامر کوسو خطاب ڪندي چيو تہ حڪمرانن پنھنجي ڪرپشن کي تحفظ ڏيڻ لاء سنڌ جي سمورن تعليمي ادارن جي شاگردن کي سياست کان پري ڪري ڇڏيو آھي۔ شاگردن جي سجاڳي ۽ ليڊرشپ جي ضرورت آھي۔ سنڌ جو ھر نوجوان تعليم يافته ھجي ۽ سنڌ ۾ علم جي روشني ھجي. سنڌ جي ترقي بي پناھ محنت ۽ تعليم سان ئي ممڪن آهي. اشفاق اشرف پليجي چيو تہ شاگرد سماج جي بي پناھ سگھ ۽ اھڙي طاقت آھن جيڪي ظلمت آڏو بيھي رھن تہ ناقابل شڪست بنجي وڃن ٿا. ميرٽ ناھي تعليمي ادارا ڪرپٽ ماڻھن وٽ يرغمال آھن. سنڌ کي ڪرپشن جي ڪالوني بنايو ويو آھي۔ ادارن کي تباھ ڪيو پيو وڃي۔ سفارش ۽ رشوت کي ڪلچر بنايو ويو آھي. نعيم شر خطاب ڪندي چيو تہ اسان جو تعليمي نصاب جديد، انسان دوست ۽ سائنٽيفڪ ھجڻ گھرجي. نوجوان سنڌ ۾ ڏوھن ۽ جھالت جو رستو روڪين ڪرپٽ حڪمرانن سنڌ ۾ ميريٽ جو جنازو ڪڍي ڇڏيو آھي، انٽري ٽيسٽ ذريعي ميڊيڪل جون سيٽون نيلام ڪيون وينديون آهن ۽ سنڌ پبلڪ سروس ڪميشن ذريعي ميرٽ کي قتل ڪري ڪڙورين روپيا وٺي نوڪريون وڪرو ڪيون ويون. فرمان ڪپري خطاب ڪندي چيو تہ جاھل حڪمرانن سنڌ جي تعليمي نظام کي تباهي جي ڪناري تي بيهاري ڇڏيو آهي.سنڌ جي تعليم جي تباھي سنڌ تي وڏو حملو آھي. سنڌ بلوچستان ۽ ڪشمير کان بہ تعليم ۾ پٺتي پيل آھي. مھدي حسن لغاري خطاب ڪندي چيو تہ دنيا محنت ۽ ميرٽ وارن جي آھي. پ پ چاھي تہ ٿي ماڻھو سوال نہ ڪن. محنت ۽ تعليم کان پري ھجن ۽ ووٽ ڏيڻ جي مشين ھجن. ظاھر ڪپري، پرمنان ڪرشن، زبير پليجو، وقار جيسر، ياسرجلباڻي، رضوان لاشاري، خان محمد ٽالپر، معضم ڀرڳڙي، ڪاشف چاچڙ، جرور لال، نريش ڪمار، آصف جوڳي، امجد رشيد ۽ ٻين ڪارڪنن ڪتابي ميلي ۾ رضاڪاري جا فرض انجام ڏنا ميلو سڀاڻي (اڄ) جاري رھندو.