ٺٽي ضلعي ۾ غير رجسٽرڊ ڪمپنين جي جعلي ٻج، دوائن ۽ ڀاڻ جو وڪرو جاري

غير رجسٽرڊ ڪمپنين جي جعلي ٻجن ۽ ڀاڻ انهن جي سموري محنت ضايع ڪري ڇڏي

ٺٽو ( شفيق ڀٽي)ضلعي ٺٽي ۾ ايگريڪلچر ايڪسٽينشن ڊپارٽمينٽ جي مبينه ملي ڀڳت سان غير رجسٽرڊ ڪمپنين پاران جعلي ٻج، غير معياري زرعي دوائن ۽ ڀاڻ جي وڪري ۾ تيزي اچي وئي آهي، جنهن سبب مقامي زميندار ۽ هاري ٻٽي عذاب ۾ مبتلا آهن۔مقامي آبادگارن موجب هڪ پاسي سنڌ حڪومت جي ناقص زرعي پاليسين ۽ انتظامي غفلت سبب فصلن لاءِ مناسب اگهه مقرر نٿا ٿين، ته ٻي پاسي غير رجسٽرڊ ڪمپنين جي جعلي ٻجن ۽ ڀاڻ انهن جي سموري محنت ضايع ڪري ڇڏي آهي۔ نتيجي طور نه ته آبادگارن کي پيداوار جو صحيح معاوضو ملي رهيو آهي، ۽ نه ئي زمين مان سٺي اپت حاصل ٿي رهي آهي۔زرعي ماهرن جو چوڻ آهي ته "جعلي ٻج ۽ غير معياري ڀاڻ استعمال ڪرڻ سان نه صرف فصلن جي پيداوار گهٽجي ٿي، پر زمين جي زرخيزي به متاثر ٿئي ٿي، جنهن جا اثر زمين تي ڪيترن سالن تائين برقرار رهن ٿا۔"ذريعن موجب، اهي ڪمپنيون آبادگارن کي قرض جي آڙ ۾ بليڪ ميل ڪري پنهنجا جعلي ٻج ۽ ڀاڻ خريد ڪرڻ تي مجبور ڪن ٿيون۔ٻئي طرف ايگريڪلچر ايڪسٽينشن ڊپارٽمينٽ جي ڪجهه عملدارن تي الزام آهي ته هو انهن ڪمپنين جي اسٽورن تان ماهوار ڀتي طور رقم وٺي کين کلي ڇڏي ڏين ٿا، جنهن جي عيوض اهي ڪمپنيون لکين رپيا ڪمائن ٿيون۔وڌيڪ انڪشاف مان معلوم ٿيو آهي ته انهن غير رجسٽرڊ ڪمپنين ۾ به مقامي نوجوانن کي نظرانداز ڪري ٻاهرين ماڻهن کي ڀرتي ڪيو ويو آهي، جيئن سندن اندروني معاملن جيو پول نه کلي پوي۔ ساڳي خدشي سبب هول سيل ڊيلر به انهن مقامي نوجوانن سان ڪاروباري لاڳاپا رکڻ کان انڪار ڪري رهيا آهن، جيڪي رجسٽرڊ ڪمپنيون شروع ڪرڻ چاهين ٿا، جيئن انهن جو نقلي ڪمپنين سان مبينه گٺ جوڙ ظاهر نه ٿئي۔مقامي آبادگارن ۽ سماجي حلقن سنڌ حڪومت، زرعي کاتي، نيب، اينٽي ڪرپشن ۽ ٻين لاڳاپيل ادارن کان مطالبو ڪيو آهي ته فوراً غير رجسٽرڊ ڪمپنين خلاف ڪارروائي ڪئي وڃي، جعلي ٻج ۽ ڀاڻ جي وڪري تي پابندي وڌي وڃي، مقامي نوجوانن کي روزگار جا موقعا فراهم ڪيا وڃن ۽ رشوت ۽ ڪرپشن ۾ ملوث سرڪاري عملدارن جو احتساب ڪيو وڃي۔آبادگارن خبردار ڪيو آهي ته جيڪڏهن حڪومت بروقت قدم نه کنيو ته ايندڙ فصل جي موسم ۾ ٺٽي جي زرعي معيشت کي ناقابلِ تلافي نقصان پهچي سگهي ٿو۔