ٺٽي ۾ نوجوان کي هاف فراءِ ڪرڻ خلاف وارثن جو احتجاج

پوليس مال جي واڙي تان اميد علي پالاري کي کنڀي هاف فراءِ ڪيو: وارث

ٺٽو ( شفيق ڀٽي)جهمپير ٿاڻي جي حد ۾ مال جي واڙي تان شورا موري جي رهواسي نوجوان اميد علي پالاري ولد شفيع محمد پالاري کي ٽي ڏينهن اڳ نوري آباد پوليس طرفان حراست ۾ وٺي، بعد ۾ مبينا طور تي جعلي پوليس مقابلي ۾ “هاف فراءِ” ڪرڻ جي واقعي خلاف پالاري برادريءَ جي ماڻهن عوامي پريس ڪلب ٺٽو ۾ پريس ڪانفرنس ڪندي سخت احتجاج ڪيو۔پريس ڪانفرنس دوران انوَر پالاري، رشيد پالاري، ڪرم پالاري ۽ محمد حسن پالاري الزام هنيو ته نوري آباد ٿاڻي جو ايس ايڇ او حاڪم جلباڻي ۽ منشي نواز لاشاري پوليس جي وڏي نفري سان گڏجي سندن گهرن تي چڙهائي ڪئي۔ پوليس زبردستي گهرن ۾ داخل ٿي چادر ۽ چارديواري جو تقدس پامال ڪيو، عورتن ۽ مردن تي تشدد ڪيو ۽ عورتن جي توهين به ڪئي۔سندن چوڻ هو ته پوليس گهرن ۾ توڙڦوڙ ڪئي ۽ 8 بڪريون، 2 موٽرسائيڪلون، سون، ڪپڙا، بسترا ۽ ٻيو قيمتي سامان کڻي وئي، جڏهن ته نوجوان اميد علي پالاري کي گرفتار ڪري نامعلوم هنڌ منتقل ڪيو ويو۔ بعد ۾ پوليس کيس جعلي مقابلي ۾ “هاف فراءِ” ڪري زخمي ڪيو ۽ ان جي خلاف ڪوڙو ڪيس داخل ڪيو۔متاثر ماڻهن ٻڌايو ته هو تازين برساتن کان پوءِ مال جي چارَي جي تلاش ۾ ضلعي ٺٽي جي حد شفو گولائي وٽ عارضي طور رهائش پذير هئا، جتي ٽي راتيون اڳ نوري آباد پوليس بلاجواز سندن گهرن تي ڇاپو هنيو۔انهن الزام لڳايو ته جڏهن پوليس سان اميد علي جي آزاديءَ لاءِ ڳالهه ڪئي وئي، تڏهن منشي نواز لاشاري پنج لک رپيا رشوت جو مطالبو ڪيو، ۽ رقم نه ڏيڻ تي پوليس کيس جعلي مقابلي ۾ زخمي ڪيو۔متاثر ماڻهن آئي جي سنڌ، ڊي آءِ جي حيدرآباد، ايس ايس پي ٺٽو ۽ ايس ايس پي ڄامشورو کان مطالبو ڪيو ته نوري آباد پوليس جي زيادتين ۽ مبينا جعلي مقابلي جي غيرجانبدار جاچ ڪرائي وڃي، گرفتار نوجوان اميد علي پالاري کي آزاد ڪيو وڃي، ڪوڙو ڪيس ختم ڪيو وڃي، ۽ پوليس طرفان کنيل سامان واپس ڪرايو وڃي۔