ملير: قاسم ڊينم جي انتظاميا ۽ ٺيڪيدار خلاف پورهيتن جو احتجاجي مارچ

پورهيتن عبدالله ڳوٺ کان رزاق آباد عوامي پريس ڪلب تائين احتجاجي پيادل مارچ ڪيو

ملير (رپورٽ: عبدالرشيد مورجھريو) قومي شاهراهه لڳ نجي ڪمپني قاسم ڊينم جي انتظاميا ۽ ٺيڪيدار راجا تنيو پاران پورهيتن کي ليبر لا تحت پگهارون ۽ بنيادي سهولتون نه ڏيڻ خلاف پورهيتن طرفان عبدالله ڳوٺ کان رزاق آباد عوامي پريس ڪلب ملير تائين احتجاجي پيادل مارچ ڪيو ويو.احتجاج ۾ پورهيتن عادل مشتاق آرائين، اصغر کوسو، ماما عرفان بليدي، صابر بليدي، سمير بليدي، صمد لاشاري، عرفان سولنگي ۽ جمن لاشاري جي اڳواڻي ۾ وڏي تعداد ۾ مزدورن شرڪت ڪئي. پورهيتن جي هٿن ۾ بينر ۽ پلي ڪارڊ هئا جن تي ليبر حقن بابت نعرا لکيل هئا.مظاهري دوران شرڪت ڪندڙ مزدورن سخت نعريبازي ڪئي ۽ مطالبو ڪيو ته پورهيت دشمن ٺيڪيدار راجا تنيو خلاف فوري قانوني ڪارروائي ڪئي وڃي ۽ کيس فيڪٽري مان هٽايو وڃي.ان موقعي تي اڳواڻن جو چوڻ هو ته سنڌ حڪومت طرفان اعلانيل گهٽ ۾ گهٽ 40 هزار رپين جي پگهار توڙي پورهيتن لاءِ رهائشي، علاج ۽ ٻيون بنيادي سهولتون نٿيون ڏنيون وڃن، جنهن سبب پورهيتن جي زندگين ۾ سخت معاشي تنگي پيدا ٿي وئي آهي.پورهيتن چيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو وڌايو ويندو ۽ وڏين شاهراهن تي ڌرڻا پڻ هنيا ويندا.