ملير ۾ هزارين ماڻهن جو ڌرڻو، 10 هزار ايڪڙن جي سمري منظور ٿيڻ تي چونڊيل نمائندن جي گهيراءُ جو چتاءُ

سنڌ حڪومت ايجوڪيشن سٽي جي نالي تي ملير جي هزارين ايڪڙ زمين هٿ ڪرڻ جي تياري ڪري رهي آهي: اڳواڻ

ملير (رپورٽ: عبدالرشيد مورجھريو) ملير ضلعي جي علائقي لنڪ روڊ تي ضياءُالدين يونيورسٽي جي دروازي اڳيان ايجوڪيشن سٽي، سنڌ حڪومت، روينيو کاتي ۽ ملير ضلعي جي چونڊيل نمائندن خلاف وڏو عوامي احتجاجي مظاهرو ڪري ڌرڻو هنيو ، جنهن ۾ هزارين ڳوٺاڻن ، سماجي تنظيمن، وڪيلن، شاگردن، مزدورن يونين ۽ متاثر مقامي رهواسي وڏي تعداد ۾ شرڪت ڪئي مظاهرو ڪندڙن جي هٿن ۾ بينر ۽ پلي ڪارڊ هئا ئ هو زمين اسان جي، اختيار اسان جو ايجوڪيشن سٽي نه، لوٽ مار سٽي نامنظور” ۽ “مقامي آباديءَ جو معاشي قتل بند ڪيو” جا اڀ ڏاريندڙ نعرا هڻي رهيا آهن احتجاج ۾ شرڪت ڪندڙن وٽ پيپلز پارٽي جا جهنڊا هئا، جڏهن ته بينرن تي سنڌ حڪومت، ضلعي انتظاميا ۽ بااثر بلڊر مافيا خلاف سخت نعرا لکيل هئا احتجاجي اجتماع کي سليم سالار، عبدالرزاق، نور حسن جوکيو، سليم جوکيو، فريد بلوچ، اڪرم بلوچ، ارشد جوکيو، حڪيم سالار ۽ ٻين اڳواڻن خطاب ڪندي چيو ته سنڌ حڪومت ايجوڪيشن سٽي جي نالي تي ملير جي هزارين ايڪڙ زمين هٿ ڪرڻ جي تياري ڪري رهي آهي اڳواڻن ٻڌايو ته ديهه چوهڙ، ديهه ڪوٽيرڙو، ديهه آبدار، ديهه اميلاڻو، ديهه ڍانڍو ۽ ديهه جوريجي سميت لڳ ڀڳ 20 هزار ايڪڙ زرعي ۽ آبادي واري زمين کي ڪمرشل منصوبن ۽ بلڊرن حوالي ڪرڻ جو منصوبو تيار ڪيو ويو آهي۔ انهن علائقن ۾ صديون پراڻا گوٺ، قبرستان، ٻنيون ۽ قانوني طور سروي ٿيل زمينون آهن مقررِين چيو ته اهو منصوبو مقامي ماڻهن جي وجود ۽ سندن معيشت تي حملو آهي، جنهن کي ڪنهن به صورت قبول نه ڪيو ويندو۔ مختلف ديهه جي نمائندن چيو ته هي زمينون اسان جي ابن ڏاڏن جي امانت آهن، اسان انهن کي ڪنهن بلڊر يا ڪمرشل منصوبي حوالي ٿيڻ نه ڏينداسين اڳواڻن الزام لڳايو ته حڪومت 124 ارب رپين جي زمين صرف 8 ارب رپين ۾ وڪرو ڪرڻ جو ارادو رکي ٿي، جيڪو سنڌ جي عوام سان کليل ناانصافي آهي احتجاج ۾ اعلان ڪيو ويو ته جيڪڏهن سنڌ ڪابينا جمعي ڏينهن سمري منظور ڪئي ته ملير مان چونڊيل نمائندن جو گهيرو ڪيو ويندو۔ شرڪت ڪندڙن حڪومت کان مطالبو ڪيو ته ايجوڪيشن سٽي منصوبي ۾ مقامي آباديءَ کي شامل ڪيو وڃي ۽ متاثر ماڻهن جي زمينن جو قانوني تحفظ يقيني بڻايو وڃي۔