ملير: سپر هاءِ وي تي حادثن ۾ 2ڄڻا فوت، مبينا مقابلي ۾ هڪ ڄڻو مارجي ويو

نشتر آباد ريلوي ٽريڪ ڀرسان مقابلي دوران رضوان پٽ فضل حڪيم مارجي ويو، لاش اسپتال منتقل

ملير (رپورٽ: عبدالرشيد مورجھريو)سپر هاءِ وي سميت ملير جي مختلف علائقن ۾ پيش آيل ڌار ڌار واقعن ۾ ٽي ڄڻا فوت ٿي ويا آهن سپر هاءِ وي تي پيش آيل ٻن ٽريفڪ حادثن ۾ ٻه ڄڻا فوت ٿي ويا۔ پهريون حادثو خان صاحب ريسٽورنٽ ڀرسان پيش آيو، جتي تيز رفتار ڪار ۽ ٽرڪ ۾ ٽڪر ٿي ويو۔ حادثي جي نتيجي ۾ ڪار سوار موقعي تي ئي فوت ٿي ويو۔ فوتي جو لاش عباسي شهيد اسپتال منتقل ڪيو ويو آهي، جڏهن ته سندس سڃاڻپ اڃا تائين نه ٿي سگهي آهي۔ فوتين جي عمر لڳ ڀڳ 45 سال ٻڌائي پئي وڃي۔ٻيو حادثو سپر هاءِ وي بقائي ٽول پلازا ڀرسان پيش آيو، جتي نامعلوم سببن جي ڪري هڪ ڄڻو ٽريفڪ حادثي جو شڪار ٿي فوت ٿي ويو۔ فوتي کي پڻ عباسي شهيد اسپتال منتقل ڪيو ويو۔ اسپتال ذريعن موجب فوتي جي سڃاڻپ عمر ولد نامعلوم طور ٿي آهي، جنهن جي عمر لڳ ڀڳ 60 سال ٻڌائي وئي آهي۔ پوليس ٻنهي حادثن جي جاچ شروع ڪري ڇڏي آهي۔ ٻئي طرف ملير نشتر آباد ريلوي ٽريڪ ڀرسان پوليس ۽ ڏوهارين وچ ۾ مقابلو ٿيو، جنهن دوران هڪ ڏوهاري مارجي ويو۔ مارجي ويل ڏوهاري کي جناح اسپتال منتقل ڪيو ويو، جتي سندس سڃاڻپ رضوان ولد فضل حڪيم طور ٿي آهي، جنهن جي عمر تقريباً 30 سال ٻڌائي وئي آهي۔ پوليس موجب مارجي ويل ڏوهاري مختلف ڏوهن ۾ ملوث هو، جڏهن ته واقعي جي وڌيڪ جاچ جاري آهي