ملير: 8 ڏينهن اڳ سمنڊ ۾ ٻڏي ويل نينگر جو لاش هٿ نه آيو، گهر ۾ ڪهرام متل

ملير (رپورٽ: عبدالرشيد مورجھريو) اڄ کان اٺ ڏينهن اڳ سمنڊ ۾ ريڙهي جو رهواسي معصوم ڏهن ورهين جو نينگر شهباز پٽ خان محمد جت دريا ۾ ڪري ٻڏي ويو شهباز پنهنجي گهر وارن سان گڏ درگاهه ابراهيم شاهه واڙي جي ميلي تان موٽي رهيو هو، جتي واپسي دوران هو حادثاتي طور سمنڊ ۾ ڪري پيو ۽ تيز لهرن کيس لوڙهي ويو۔غم ۾ ٻڏل وارثن موجب ڪيترائي ڏينهن گذرڻ باوجود نينگر جو لاش اڃا تائين نه ملي سگهيو آهي، جنهن سبب گهر ۾ ڏک ۽ بيچيني وڌي وئي آهي گهر ڀاتين ۽ علائقي جي ماڻهن فوري نوٽيس وٺڻ جي اپيل ڪندي فشريز کاتي، ڪوسٽ گارڊ، ايم ايس اي، اڌي ۽ ٻين رضاڪارن کي اپيل ڪئي وئي آهي ته سمنڊ ۾ مڪمل ۽ گڏيل ريسڪيو آپريشن شروع ڪري معصوم شهباز جي لاش جي ڳولا ۾ مدد ڪن، جيئن گهروارن کي سندن ٻار جي آخري ديدار جو حق ملي سگهي مقامي ماڻهن جو چوڻ آهي ته جيڪڏهن لاش جي ڳولا وقت سر ۽ منظم طريقي سان ڪئي وڃي ها ته شايد معصوم جو پتو اڳ ئي لڳي وڃي ها۔ هن وقت ضرورت آهي ته سموريون ادارا گڏجي هڪ منظم حڪمتِ عملي سان آپريشن جاري رکن