ڪنري ۾ دڪانن جي مالڪي تان پٺاڻ، ڪلر ۽ ڪپري برادرين ۾ ڇڪتاڻ، فائرنگ، ڪيترائي زخمي

عمرڪوٽ(ڊ ر)ڪنري شھر جي عمرڪوٽ لوڪل بس اسٽاپ تي ٽن دڪانن جي مالڪي تان پٺاڻ برداري جو ڪپري ۽ ڪلر برادرين سان تڪرار ۽ ڇڪتاڻ وارو ماحول تيز ٿي ويو. پٺاڻ برداري پاران رات جي وقت دڪانن جا تالا ٽوڙي قبضو ڪري ڇڏيو جنھن بعد ڌرين ۾ ڇڪتاڻ وڌي وئي، ٻنھي ڌرين پاران ھڪٻئي خلاف احتجاجي مظاهرا ڪري قبضن جا الزام لڳايا ويا، تڪرار وڌڻ بعد ڄاڻايل دڪانن تي ٻنھي ڌرين جو جيھڙو ٿي پيو ۽ ھڪٻئي تي سري عام فائرنگ ڪئي وئي وچ بازار ۾ سري عام فائرنگ سبب علائقو جنگ جو ميدان بڻجي ويو ۽ سخت خوف ۽ حراس پکڙجي ويو. فائرنگ دوران ڇيرا لڳڻ سبب شھرين ۽ ڌرين جي ماڻھن سميت 7 ڄڻا زخمي ٿي پيا، زخمين ۾ شھزاد گشڪوري، شيراز پٺاڻ، وسيم شبراتي، کيتسنگھ بجير، راشد آرائين ۽ ٻيا شامل آھن، سمورن زخمين کي تعلقي اسپتال نيو ويو جتان ٻن ڄڻن شيراز پٺاڻ ۽ شھزاد گشڪوري کي حيدرآباد ريفر ڪيو ويو. واقعي بعد شھري وڏي انگ ۾ پھچي ويا ۽ تماشو ڏسندا رهيا مسلسل هڪ ڪلاڪ تائين پوليس ۽ انتظاميا غائب رهي جنھن بعد پوليس پوليس پھچي ڌرين کي ڇڙوڇڙ ڪيو اطلاع تي نبي سر روڊ ۽ ٽالھي سميت ٻين ٿاڻن جي پوليس نفري به پھچي وئي ۽ پوليس ڪپري برادري جي ٻن ڄڻن گرفتار ڪري ٿاڻي منتقل ڪري ڇڏيو، جنھن پوليس اسسٽنٽ ڪمشنر ڪنري محمد خان ڀنگوار پھچي ڄاڻايل دڪانن کي سيل ڪري ڇڏيو ۽ واقعي واري ھنڌ پوليس پڪٽ قائم ڪري ڇڏيو. هوڏانھن ڪنري. ٽن دڪانن تي مبينه قبضي تان ڇڪتاڻ ھڪٻئي خلاف احتجاج ڪيو ويو. هڪ ڌر جي متاثرن الهڏنو ڪلر، پيرو ڪپري ۽ ٻين شهرين ۽ دڪاندارن سان گڏجي نيشنل پريس ڪلب اڳيان احتجاجي مظاهرو ڪري نعريبازي ڪندي الزام لڳايو ته اسان جا دڪان لينڊ ڪميشن جا آھن اسان 30 سالن کان ويٺل آھيون پر حيات پٺاڻ ۽ نيڪ محمد پٺاڻ وارن رات جو دير سان هٿيارن جي زور تي اسان جي دڪانن تي قبضو ڪري لکين روپين جو سامان کڻي ويا ۽ پنهنجا تالا لڳائي ڇڏيا آھن، هنن چيو ته اسان جو ڪيس ڪورٽ ۾ ھلندڙ آھي ان باوجود قبضہ مافيا اسان جي دڪانن تي قبضو ڪيو آھي قبضو خالي ڪرائي انصاف ڏياريو وڃي. ٻئي پاسي الزام هيٺ آيل پٺاڻ ڌر جي نيڪ محمد پٺاڻ وارن نيشنل پريس ڪلب ڪنري ۾ پريس ڪانفرنس ڪندي الزامن کي رد ڪندي چيو ته اسان 12 دڪان رمضان قادياني کان ورتا 9 مليا ٽن جو قبضو نه مليو، چڱن مڙسن کي دانهن ڏني پر هنن دڪان خالي نه ڪيا الٽو اسان کي ڌمڪيون ڏنيون اسان ڪورٽن مان ڪيس کٽي آيا آھيون، دڪان اسان خريد ڪيا آھن اسان کي ڪوبه جاني مالي نقصان ٿيو ان جا ذميوار پيرو ڪپري ۽ الهڏنو ڪلر وارا هوندا. هنن مطالبو ڪيو ته دڪانون خالي ڪرائي انصاف ڪيو وڃي. آخري اطلاعن تائين ڌرين ۾ ڇڪتاڻ برقرار هئي ۽ ڪوبه ڪيس داخل نه ٿي سگهيو.