ملير ۾ صفائي جو ناقص نظام، ڪچري جي ڍيرن سبب شهري زندگي عذاب بڻجي وئي

ڪچري جا وڌندڙ ڍير ماحولياتي آلودگي سان گڏ مختلف بيمارين جي پکڙجڻ جو به ڪارڻ بڻجڻ لڳا

ملير (رپورٽ: عبدالرشيد مورجھريو) ضلعي ملير جي مختلف علائقن ۾ صفائي سٿرائي جي خراب صورتحال شهرين جي زندگي عذاب بڻائي ڇڏي آهي۔ گندگي ۽ ڪچري جا وڌندڙ ڍير نه صرف ماحولياتي آلودگي جو سبب بڻجي رهيا آهن پر مختلف بيمارين جي پکڙجڻ جو خطرو پڻ وڌي ويو آهي، جنهن تي علائقي واسين سخت ڳڻتي جو اظهار ڪيو آهي۔علائقي واسين موجب حسن پنھور ڳوٺ، سنڌي جماعت ڪوآپريٽو هائوسنگ سوسائٽي فيز ٽو، سنڌي محلو، منزل پمپ ۽ ٻين مختلف علائقن ۾ صفائي جو نظام بري طرح متاثر آهي۔ گهٽين، رستن ۽ خالي پلاٽن تي ڪچري جا ڍير گڏ ٿيڻ روز جو معمول بڻجي ويو آهي، جنهن سبب علائقي ۾ بدبوَ پکڙجي رهي آهي ۽ شهرين کي سخت مشڪلاتن کي منهن ڏيڻو پئجي رهيو آهي۔علائقي واسين جو وڌيڪ چوڻ هو ته ڪچري جي ڍيرن سبب مڇرن ۽ مکين جي واڌ ويجهه ۾ اضافو ٿي ويو آهي، جنهن ڪري مليريا، ڊينگي ۽ ٻين متعدي بيمارين جي پکڙجڻ جو خدشو وڌي ويو آهي۔ رهواسين موجب ٻار، عورتون ۽ بزرگ هن صورتحال کان سڀ کان وڌيڪ متاثر ٿي رهيا آهن۔ سنڌي جماعت ڪوآپريٽو هائوسنگ سوسائٽي فيز ٽو جي رهواسين ذوالفقار، منير، الله ڏنو، ڪامران ۽ ٻين شهرين لاڳاپيل ادارن کان مطالبو ڪيو آهي ته فوري طور علائقن مان ڪچرو هٽايو وڃي، صفائي جي نظام کي بهتر بڻايو وڃي ۽ مڇرن جي خاتمي لاءِ باقاعده اسپري مهم شروع ڪئي وڃي۔ علائقي واسين خبردار ڪيو آهي ته جيڪڏهن صفائي جي صورتحال کي فوري طور بهتر نه ڪيو ويو ته بيماريون وڌيڪ پکڙجي سگهن ٿيون، جنهن سان عوام جي صحت کي سنگين خطرا لاحق ٿي سگهن ٿا۔ شهرين ضلعي انتظاميا ۽ بلدياتي ادارن کان فوري نوٽيس وٺڻ جو مطالبو ڪيو آهي۔