پاکستان میں ریبیز کے خاتمےاور کتے کے کاٹنے سے تحفظ کے لیے اہم اجلاس منعقد

کراچی، پاکستان میں کتے کے کاٹنے سے تحفظ اور ریبیز کے خاتمے کے لیے حکمتِ عملی طے کرنے کے سلسلے میں ایک اہم اجلاس منعقد ہوا۔ اجلاس میں چیف سیکریٹری سندھ جناب آصف حیدر شاہ، ایف پی سی سی آئی کی سی ایس آر کمیٹی کے سربراہ و لائف ممبر جناب صدیق شیخ، انڈس ہسپتال اینڈ ہیلتھ نیٹ ورک کے صدر ڈاکٹر عبدالباری خان، شعبہ امراضِ متعدی کی سربراہ محترمہ نسیم صلاح الدین، پی ڈی ریبیز کنٹرول پروگرام سندھ محترمہ سمیرا حسین، اور ایف پی سی سی آئی کی سی ایس آر ایکٹوسٹ محترمہ شمسا جبین نے شرکت کی۔ اجلاس میں اس امر پر زور دیا گیا کہ ملک میں کتے کے کاٹنے اور ریبیز جیسے سنگین مسئلے سے نمٹنے کے لیے مشترکہ کوششیں ناگزیر ہیں۔ اہم اسٹیک ہولڈرز نے عزم ظاہر کیا کہ وہ کتے کی آبادی پر قابو پانے، عوامی آگاہی بڑھانے، اور ویکسینیشن و علاج کی سہولیات کو آسان بنانے کے لیے مل کر کام کریں گے۔ چیف سیکریٹری سندھ جناب آصف حیدر شاہ نے کہا، "ہم شہریوں کو کتے کے کاٹنے سے محفوظ رکھنے اور پاکستان سے ریبیز کے خاتمے کے لیے مشترکہ طور پر کام کرنے کے عزم پر قائم ہیں۔" جناب ثاقب فیاض مگوں نے ریبیز کنٹرول کی حکمتِ عملی کے حوالے سے فیڈریشن آف پاکستان چیمبرز آف کامرس اینڈ انڈسٹری کی جانب سے ہر ممکن تعاون اور کردار ادا کرنے کی یقین دہانی کرائی۔ شرکاء نے اس بات پر اتفاق کیا کہ وہ ایک جامع منصوبہ تیار کرنے کے لیے باہمی اشتراک سے کام کریں گے، جس میں حکومتی اداروں، صحت کے شعبے سے وابستہ افراد اور عوام کو شامل کر کے مستقبل میں پاکستان کو ریبیز سے پاک ملک بنایا جا سکے۔