ملير: مهانگائي سبب ماهيگير سخت پريشان، ڊيزل مهانگو ٿيڻ ڪري لانچون بيهڻ جو خدشو

ملڪ ۾ وڌندڙ مهانگائي غريب ماهيگيرن کي سخت معاشي مشڪلاتن ۾ وجهي ڇڏيو آهي: مهاڻا

ملير (رپورٽ: عبدالرشيد مورجھريو) ملڪ ۾ وڌندڙ مهانگائي غريب ماهيگيرن کي سخت معاشي مشڪلاتن ۾ وجهي ڇڏيو آهي. پيٽرول ۽ ڊيزل جي لڳاتار وڌندڙ قيمتن سبب ماهيگيري جو پيشو وڌيڪ ڏکيو ٿيندو پيو وڃي. ماهيگيرن جو چوڻ آهي ته ٻيڙين لاءِ گهربل راشن، برف ۽ ٻين ضروري سامان جون قيمتون به تمام گهڻيون وڌي ويون آهن، جنهن سبب خرچن ۾ وڏو اضافو ٿي ويو آهي.ماهيگير اڳواڻ مجيد موٽاڻي ۽ ٻين ڳڻتي ظاهر ڪندي چيو آهي ته وڌندڙ مهانگائي ماهيگيرن جي ڪمر ٽوڙي ڇڏي آهي. هنن ٻڌايو ته وچولي درجي جي هڪ لانچ جيڪا لڳ ڀڳ 12 ڪلاڪن ۾ 200 ليٽر ڊيزل استعمال ڪري ٿي، ڊيزل مهانگو ٿيڻ ڪري هاڻي ساڳئي وقت ۾ لڳ ڀڳ 11 هزار رپيا وڌيڪ خرچ ڪرڻا پئجي رهيا آهن.هنن چيو ته اڳ ئي ڊيزل جي وڌيڪ خرچ سبب ڪيترين ئي لانچن جو ڪم بند پيو هو ۽ ماهيگير مالي مشڪلاتن کي منهن ڏئي رهيا هئا، جڏهن ته هاڻي ڊيزل جي وڌيڪ مهانگائي سبب وڌيڪ لانچن جي بيهڻ جو خدشو پيدا ٿي ويو آهي.ماهيگير اڳواڻن خبردار ڪيو آهي ته جيڪڏهن صورتحال اهڙي ئي رهي ته وڏي تعداد ۾ ماهيگير بيروزگار ٿي سگهن ٿا، جنهن سان هزارين خاندان معاشي بحران جو شڪار ٿي ويندا.هنن حڪومت کان مطالبو ڪيو آهي ته ماهيگيرن کي ڊيزل تي خاص سبسڊي ڏني وڃي ۽ ماهيگيري سان لاڳاپيل سامان جون قيمتون ڪنٽرول ڪيون وڃن ته جيئن هن پيشي سان وابسته هزارين خاندانن کي معاشي تباهي کان بچائي سگهجي.