ٺٽو: زمين تي قبضي، جعلي رڪارڊ ۽ کاتي جي تياري خلاف متاثر شخص جي دانهن

ٺٽو ( محمد شفيق ڀٽي) گهارو شهر جي خانيا محلي جي رهواسي ايوب خانيو عوامي پريس ڪلب ٺٽو ۾ صحافين آڏو دانهن ڏيندي الزام هنيو آهي ته سندس ديهه گهارو سروي ۾ واقع 30 سالا ليز واري زمين جو جعلي رڪارڊ تيار ڪري قبضا مافيا سان لاڳاپيل بلڊر عالم شير هديو کي وڪرو ڪيو ويو آهي. متاثر وڌيڪ الزام هنيو ته مذڪوره بلڊر کي جعلي کاتو قمر مغل نالي شخص تيار ڪري ڏنو آهي، جيڪو گهارو ۾ سياسي ڪائونسلر طور سڃاتو وڃي ٿو. هن دعويٰ ڪئي ته جعلي کاتي ۽ رڪارڊ جي بنياد تي سندس زمين تي قبضي جي ڪوشش ڪئي پئي وڃي. ايوب خانيو چيو ته عالم شير هديو مبينا طور پنهنجي اثر رسوخ ۽ طاقت جي زور تي زمين تي اڏاوتون ڪرائي پلاٽنگ جو ڪم جاري رکيو ويٺو آهي، جڏهن ته زمين جا اصل ۽ قانوني دستاويز وٽس موجود آهن. هن ڊپٽي ڪمشنر ٺٽو، اينٽي ڪرپشن ۽ لاڳاپيل اختيارين کان مطالبو ڪيو ته معاملي جي شفاف جاچ ڪرائي جعلي رڪارڊ ۽ کاتي جي تياري ۾ ملوث ماڻهن خلاف قانوني ڪارروائي ڪئي وڃي، زمين تي ٿيندڙ مبينا غيرقانوني اڏاوتون روڪيون وڃن ۽ کيس سندس زمين جو قبضو واپس ڏياريو وڃي.