جاتي ڀرسان يوسي مريد کوسو ۾ نوجوان گوليون هڻي قتل

نظير لکاٽيو کي سندس چاچي يوسف لکاٽيو گوليون هڻي قتل ڪيو

جاتي(رپورٽر) جاتي ڀرسان يونين ڪائونسل مريد کوسو ۾ مبينا طور چاچي پنهنجي ڀائيٽي کي گوليون هڻي قتل ڪري ڇڏيو. مقتول جي سڃاڻپ نظير لکاٽيو طور ٿي آهي، جڏهن ته مبينا جوابدار جو نالو يوسف لکاٽيو ٻڌايو پيو وڃي. مقامي ذريعن موجب فائرنگ جي نتيجي ۾ نظير لکاٽيو سخت زخمي ٿي پيو، جنهن کي ترت اسپتال منتقل ڪيو ويو، پر هو زخمن جا سور نه سهندي فوت ٿي ويو. واقعي کان پوءِ علائقي ۾ خوف ۽ هراس سان گڏ سوڳ جي فضا ڇانئجي وئي. اطلاع ملڻ تي پوليس واقعي واري هنڌ پهچي شاهديون گڏ ڪري ورتيون ۽ واقعي جي جاچ شروع ڪري ڇڏي آهي. پوليس موجب قتل جي سببن ۽ ٻين حقيقتن کي معلوم ڪرڻ لاءِ مختلف پهلوئن کان جاچ جاري آهي، جڏهن ته مبينا جوابدار يوسف لکاٽيو جي گرفتاري لاءِ ڪوششون پڻ جاري آهن. آخري اطلاعن تائين واقعي جو ڪيس داخل ٿيڻ ۽ وڌيڪ قانوني ڪارروائي عمل هيٺ هئي، جڏهن ته پوليس جو چوڻ آهي ته جاچ مڪمل ٿيڻ کان پوءِ وڌيڪ تفصيل جاري ڪيا ويندا.