نوشھروفيروز ۾ ايس ٽي پي جي مرڪزي سڏ تي احتجاجي ريلي ڪڍي وئي

احتجاج دوران ڪارڪنن علامتي طور ڊي سي آفيس جو مرڪزي گيٽ بند ڪري سخت نعريبازي ڪئي

نوشهروفيروز (ڊر)سنڌ ترقي پسند پارٽي جي مرڪزي سڏ تي نوشهرو فيروز ۾ الله واري چونڪ کان ڊپٽي ڪمشنر آفيس نوشهرو فيرو آڏو ريلي ڪڍي احتجاجي مظاهرو ڪيو ويو. احتجاج دوران ڪارڪنن علامتي طور ڊي سي آفيس جو مرڪزي گيٽ بند ڪري سخت نعريبازي ڪئي ۽ گو افغاني گو جا نعرا هنيا ۽ ڊپٽي ڪمشنر کي هڪ يادداشت پيش ڪئي. احتجاجي ريلي جي اڳواڻي نثارڪيريو۔ اسد چانڊيو ۔ اقبال راڄپر ۽ ٻيا ڪري رهيا هيا، ڊپٽي ڪمشنر نوشهرو فيروز کي يادداشت ۾ مطالبو ڪيو ويو ته وفاقي حڪومت طرفان غيرقانوني طور رهندڙ افغان شهرين بابت جاري ڪيل حڪمن تي فوري ۽ اثرائتو عملدرآمد ڪيو وڃي، ۽ ضلع نوشهرو فيروز سميت سڄي سنڌ ۾ موجود غيرقانوني افغان شهرين کي قانون موجب واپس موڪليو وڃي، جيئن سنڌ جي عوام جي جان ۽ مال جو تحفظ، امن امان ۽ مقامي وسيلن تي مقامي رهواسين جو حق يقيني بڻائي سگهجي ۔ان موقعي تي ايس ٽي پي اڳواڻن چيو ته هو قانون تي سڀني لاءِ هڪجهڙو عملدرآمد چاهين ٿا ۽ وفاقي حڪومت جي جاري ڪيل حڪمن تي بنا ڪنهن ديرجي عمل ٿيڻ گهرجي۔ هنن خبردار ڪيو ته جيڪڏهن سندن مطالبن تي عمل نه ڪيو ويو ته احتجاج جو دائرو وڌيڪ وسيع ڪيو ويندو.