ملير: خانگي ڪمپنين جي زهريلي پاڻي سبب علائقي ۾ مختلف بيماريون پکڙجڻ لڳيون، احتجاج

سپر هاءِ وي لڳ خانگي ڪمپنين مان زهريلي ۽ گندي پاڻي جي نيڪال سبب علائقي ۾ بيماريون پکڙجي ويون آهن: مظاهرين

ملير (رپورٽ: عبدالرشيد مورجھريو) سپر هاءِ وي لڳ خانگي ڪمپنين مان زهريلي ۽ گندي پاڻي جي ڇوڙ سبب علائقي واسي چمڙي، پيٽ ۽ دم جي بيمارين ۾ مبتلا، دنبه ڳوٺ سميت ڀرپاسي جي علائقن جا رهواسي وڏي تعداد ۾ احتجاج ڪندا نڪري آيا، ڪمپنين سامھون احتجاجي مظاهرو ۽ ڌرڻو، گندي پاڻي جو ڇوڙ بند ڪيو، انتظاميا خلاف ڪارروائي ڪيو، ماحول کي تباهه ٿيڻ کان بچايو جا اڀ ڏاريندڙ نعرا ماحوليات کاتي ۽ ضلعي انتظاميا کي ميمورينڊم جاري، صدين کان آباد آهيون نجي ڪمپنين ۾ روزگار ته نٿو ڏنو وڃي اٽلندو غيرقانوني طور تي بورينگ ذريعي پاڻي حاصل ڪري زهريلو ۽ گندي پاڻي جو آبادين ۾ ڇوڙ ڪيو ٿو وڃي، ڪارروائي نه ڪئي وئي ته نجي ڪمپنين خلاف سپر هاءِ وي تي ڌرڻو هڻنداسين اڳواڻ تفصيل موجب ملير ۾ سپر هاءِ وي لڳب خانگي ڪمپنين مان زهريلي ۽ گندي پاڻي جي نيڪال سبب علائقي واسي چمڙي، پيٽ ۽ دم جي بيمارين ۾ مبتلا ٿي ويا آهن، ان سلسلي ۾ علائقي جي سماجي اڳواڻن نهايت ڳڻتي جو اظهار ڪندي احتجاج جو سڏ ڏنو جنهن جي نتيجي ۾ وڏي تعداد ۾ علائقي واسي نظير عالياڻي، باسط پالاري، فياض پالاري، نواب پالاري، گلشير پالاري ۽ ٻين جي اڳواڻي ۾ احتجاج ڪندا گهرن کان ٻاهر نڪري آيا ۽ ڄاڻايل نجي ڪمپنين سامھون گڏ ٿي احتجاجي مظاهرو ڪندي ڌرڻو هنيو، هو گندي پاڻي جو ڇوڙ بند ڪيو، انتظاميا جي خلاف ڪارروائي ڪيو، ماحول کي تباهه ٿيڻ کان بچايو جا اڀ ڏاريندڙ نعرا هڻي رهيا هئا، ان موقعي تي هنن صحافين سان ڳالهائيندي چيو ته اسان صدين کان آباد آهيون پر علائقي ۾ موجود نجي ڪمپنين ۾ بي روزگار نوجوانن کي روزگار نٿو ڏنو وڃي، اٽلندو ڪمپنين مان زهريلي پاڻي جو علائقي ۾ ڇوڙ ڪري مختلف بيمارين ۾ مبتلا ڪيو پيو وڃي، هنن الزام هنيو ته ڪمپني انتظاميا غير قانوني طور تي بورينگ ذريعي وڏي پئماني تي پاڻي حاصل ڪري زهريلي ۽ گندي پاڻي جو ڇوڙ آبادين ۾ ڪري رهي آهي، هنن اعلان ڪيو ته ڄاڻايل ڪمپنين خلاف ڪارروائي نه ڪئي وئي ته سپر هاءِ وي تي ڌرڻو هڻڻ ۾ مجبور ٿي پونداسين .